13.2 โจทกาทิปฏิปตฺติ
โจทเกน กถํ ปฏิปชฺชิตพฺพํ? จุทิตเกน กถํ ปฏิปชฺชิตพฺพํ? สํเฆน กถํ ปฏิปชฺชิตพฺพํ? อนุวิชฺชเกน กถํ ปฏิปชฺชิตพฺพํ? โจทเกน กถํ ปฏิปชฺชิตพฺพนฺติ? โจทเกน ปญฺจสุ ธมฺเมสุ ปติฏฺฐาย ปโร โจเทตพฺโพ. กาเลน วกฺขามิ โน อกาเลน, ภูเตน วกฺขามิ โน อภูเตน, สเณฺหน วกฺขามิ โน ผรุเสน, อตฺถสํหิเตน วกฺขามิ โน อนตฺถสํหิเตน, เมตฺตาจิตฺโต วกฺขามิ โน โทสนฺตโรติ— โจทเกน เอวํ ปฏิปชฺชิตพฺพํ. จุทิตเกน กถํ ปฏิปชฺชิตพฺพนฺติ? จุทิตเกน ทฺวีสุ ธมฺเมสุ ปฏิปชฺชิตพฺพํ. สจฺเจ จ อกุปฺเป จ— จุทิตเกน เอวํ ปฏิปชฺชิตพฺพํ. สํเฆน กถํ ปฏิปชฺชิตพฺพนฺติ? สํเฆน โอติณฺณาโนติณฺณํ ชานิตพฺพํ. สํเฆน เอวํ ปฏิปชฺชิตพฺพํ. อนุวิชฺชเกน กถํ ปฏิปชฺชิตพฺพนฺติ? อนุวิชฺชเกน เยน ธมฺเมน เยน วินเยน เยน สตฺถุสาสเนน ตํ อธิกรณํ วูปสมฺมติ ตถา ตํ อธิกรณํ วูปสเมตพฺพํ. อนุวิชฺชเกน เอวํ ปฏิปชฺชิตพฺพํ.
อุโปสโถ กิมตฺถาย,_
ปวารณา กิสฺส การณา;
ปริวาโส กิมตฺถาย,
มูลายปฏิกสฺสนา กิสฺส การณา;
มานตฺตํ กิมตฺถาย,
อพฺภานํ กิสฺส การณา.
อุโปสโถ สามคฺคตฺถาย,_
วิสุทฺธตฺถาย ปวารณา;
ปริวาโส มานตฺตตฺถาย,
มูลายปฏิกสฺสนา นิคฺคหตฺถาย;
มานตฺตํ อพฺภานตฺถาย,
วิสุทฺธตฺถาย อพฺภานํ.
ฉนฺทา โทสา ภยา โมหา,
เถเร จ ปริภาสติ;
กายสฺส เภทา ทุปฺปญฺโญ,
ขโต อุปหตินฺทฺริโย;
นิรยํ คจฺฉติ ทุมฺเมโธ,
น จ สิกฺขาย คารโว.
น จ อามิสํ นิสฺสาย,
น จ นิสฺสาย ปุคฺคลํ;
อุโภ เอเต วิวชฺเชตฺวา,_
ยถาธมฺโม ตถา กเร.