17.11 สํฆเภทกวคฺค
“กติหิ นุ โข, ภนฺเต, องฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ”ติ?
“ปญฺจหุปาลิ, องฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, วินิธาย ทิฏฺฐิํ กมฺเมน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, วินิธาย ทิฏฺฐิํ อุทฺเทเสน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, วินิธาย ทิฏฺฐิ โวหรนฺโต— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, วินิธาย ทิฏฺฐิํ อนุสฺสาวเนน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, วินิธาย ทิฏฺฐิํ สลากคฺคาเหน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, วินิธาย ขนฺติํ กมฺเมน …เป… วินิธาย ขนฺติํ อุทฺเทเสน …เป… วินิธาย ขนฺติํ โวหรนฺโต …เป… วินิธาย ขนฺติํ อนุสฺสาวเนน …เป… วินิธาย ขนฺติํ สลากคฺคาเหน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ อวินยํ วินโยติ ทีเปติ, วินยํ อวินโยติ ทีเปติ, วินิธาย รุจิํ กมฺเมน …เป… วินิธาย รุจิํ อุทฺเทเสน …เป… วินิธาย รุจิํ โวหรนฺโต …เป… วินิธาย รุจิํ อนุสฺสาวเนน …เป… วินิธาย รุจิํ สลากคฺคาเหน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, วินิธาย สญฺญํ กมฺเมน …เป… วินิธาย สญฺญํ อุทฺเทเสน …เป… วินิธาย สญฺญํ โวหรนฺโต …เป… วินิธาย สญฺญํ อนุสฺสาวเนน …เป… วินิธาย สญฺญํ สลากคฺคาเหน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก อาปายิโก เนรยิโก กปฺปฏฺโฐ อเตกิจฺโฉ”ติ.
สํฆเภทกวคฺโค นิฏฺฐิโต เอกาทสโม.
ตสฺสุทฺทานํ
วินิธาย ทิฏฺฐิํ กมฺเมน,
อุทฺเทเส โวหเรน จ;_
อนุสฺสาวเน สลาเกน,
ปญฺเจเต ทิฏฺฐินิสฺสิตา;
ขนฺติํ รุจิญฺจ สญฺญญฺจ,
ตโย เต ปญฺจธา นยาติ.