17.12 ทุติยสํฆเภทกวคฺค
“กติหิ นุ โข, ภนฺเต, องฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ”ติ?
“ปญฺจหุปาลิ, องฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, อวินิธาย ทิฏฺฐิํ กมฺเมน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, อวินิธาย ทิฏฺฐิํ อุทฺเทเสน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, อวินิธาย ทิฏฺฐิํ โวหรนฺโต. อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, อวินิธาย ทิฏฺฐิํ อนุสฺสาวเนน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, อวินิธาย ทิฏฺฐิํ สลากคฺคาเหน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, อวินิธาย ขนฺติํ กมฺเมน …เป… อวินิธาย ขนฺติํ อุทฺเทเสน …เป… อวินิธาย ขนฺติํ โวหรนฺโต …เป… อวินิธาย ขนฺติํ อนุสฺสาวเนน …เป… อวินิธาย ขนฺติํ สลากคฺคาเหน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, อวินิธาย รุจิํ กมฺเมน …เป… อวินิธาย รุจิํ อุทฺเทเสน …เป… อวินิธาย รุจิํ โวหรนฺโต …เป… อวินิธาย รุจิํ อนุสฺสาวเนน …เป… อวินิธาย รุจิํ สลากคฺคาเหน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ.
อปเรหิปิ, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ. กตเมหิ ปญฺจหิ? อิธุปาลิ, ภิกฺขุ อธมฺมํ ธมฺโมติ ทีเปติ, ธมฺมํ อธมฺโมติ ทีเปติ, อวินยํ วินโยติ ทีเปติ, วินยํ อวินโยติ ทีเปติ, อวินิธาย สญฺญํ กมฺเมน …เป… อวินิธาย สญฺญํ อุทฺเทเสน …เป… อวินิธาย สญฺญํ โวหรนฺโต …เป… อวินิธาย สญฺญํ อนุสฺสาวเนน …เป… อวินิธาย สญฺญํ สลากคฺคาเหน— อิเมหิ โข, อุปาลิ, ปญฺจหงฺเคหิ สมนฺนาคโต สํฆเภทโก น อาปายิโก น เนรยิโก น กปฺปฏฺโฐ น อเตกิจฺโฉ”ติ.
ทุติยสํฆเภทกวคฺโค นิฏฺฐิโต ทฺวาทสโม.
ตสฺสุทฺทานํ
อวินิธาย ทิฏฺฐิํ กมฺเมน,
อุทฺเทเส โวหเรน จ;_
อนุสฺสาวเน สลาเกน,
ปญฺเจเต ทิฏฺฐินิสฺสิตา;
ขนฺติํ รุจิญฺจ สญฺญญฺจ,
ตโย เต ปญฺจธา นยา.
เหฏฺฐิเม กณฺหปกฺขมฺหิ,
สมวีสติ วิธี ยถา;
ตเถว สุกฺกปกฺขมฺหิ,
สมวีสติ ชานถาติ.