18.2 สํฆาทิเสส
อุปกฺกมิตฺวา อสุจิํ โมเจนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? อุปกฺกมิตฺวา อสุจิํ โมเจนฺตสฺส สํฆาทิเสโส เอเกน สมุฏฺฐาเนน สมุฏฺฐาติ— กายโต จ จิตฺตโต จ สมุฏฺฐาติ, น วาจโต. (1)
มาตุคาเมน สทฺธิํ กายสํสคฺคํ สมาปชฺชนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? มาตุคาเมน สทฺธิํ กายสํสคฺคํ สมาปชฺชนฺตสฺส สํฆาทิเสโส เอเกน สมุฏฺฐาเนน สมุฏฺฐาติ— กายโต จ จิตฺตโต จ สมุฏฺฐาติ, น วาจโต. (2)
มาตุคามํ ทุฏฺฐุลฺลาหิ วาจาหิ โอภาเสนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? มาตุคามํ ทุฏฺฐุลฺลาหิ วาจาหิ โอภาเสนฺตสฺส สํฆาทิเสโส ตีหิ สมุฏฺฐาเนหิ สมุฏฺฐาติ— สิยา กายโต จ จิตฺตโต จ สมุฏฺฐาติ น วาจโต; สิยา วาจโต จ จิตฺตโต จ สมุฏฺฐาติ, น กายโต; สิยา กายโต จ วาจโต จ จิตฺตโต จ สมุฏฺฐาติ. (3)
มาตุคามสฺส สนฺติเก อตฺตกามปาริจริยาย วณฺณํ ภาสนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? มาตุคามสฺส สนฺติเก อตฺตกามปาริจริยาย วณฺณํ ภาสนฺตสฺส สํฆาทิเสโส ตีหิ สมุฏฺฐาเนหิ สมุฏฺฐาติ …เป… . (4)
สญฺจริตฺตํ สมาปชฺชนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? สญฺจริตฺตํ สมาปชฺชนฺตสฺส สํฆาทิเสโส ฉหิ สมุฏฺฐาเนหิ สมุฏฺฐาติ— สิยา กายโต สมุฏฺฐาติ, น วาจโต น จิตฺตโต; สิยา วาจโต สมุฏฺฐาติ, น กายโต น จิตฺตโต; สิยา กายโต จ วาจโต จ สมุฏฺฐาติ, น จิตฺตโต; สิยา กายโต จ จิตฺตโต จ สมุฏฺฐาติ, น วาจโต; สิยา วาจโต จ จิตฺตโต จ สมุฏฺฐาติ, น กายโต; สิยา กายโต จ วาจโต จ จิตฺตโต จ สมุฏฺฐาติ. (5)
สญฺญาจิกาย กุฏิํ การาเปนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? สญฺญาจิกาย กุฏิํ การาเปนฺตสฺส สํฆาทิเสโส ฉหิ สมุฏฺฐาเนหิ สมุฏฺฐาติ …เป… . (6)
มหลฺลกํ วิหารํ การาเปนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? มหลฺลกํ วิหารํ การาเปนฺตสฺส สํฆาทิเสโส ฉหิ สมุฏฺฐาเนหิ สมุฏฺฐาติ …เป… . (7)
ภิกฺขุํ อมูลเกน ปาราชิเกน ธมฺเมน อนุทฺธํเสนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? ภิกฺขุํ อมูลเกน ปาราชิเกน ธมฺเมน อนุทฺธํเสนฺตสฺส สํฆาทิเสโส ตีหิ สมุฏฺฐาเนหิ สมุฏฺฐาติ …เป… . (8)
ภิกฺขุํ อญฺญภาคิยสฺส อธิกรณสฺส กิญฺจิ เทสํ เลสมตฺตํ อุปาทาย ปาราชิเกน ธมฺเมน อนุทฺธํเสนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? ภิกฺขุํ อญฺญภาคิยสฺส อธิกรณสฺส กิญฺจิ เทสํ เลสมตฺตํ อุปาทาย ปาราชิเกน ธมฺเมน อนุทฺธํเสนฺตสฺส สํฆาทิเสโส ตีหิ สมุฏฺฐาเนหิ สมุฏฺฐาติ …เป… . (9)
สํฆเภทกสฺส ภิกฺขุโน ยาวตติยํ สมนุภาสนาย น ปฏินิสฺสชฺชนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? สํฆเภทกสฺส ภิกฺขุโน ยาวตติยํ สมนุภาสนาย น ปฏินิสฺสชฺชนฺตสฺส สํฆาทิเสโส เอเกน สมุฏฺฐาเนน สมุฏฺฐาติ— กายโต จ วาจโต จ จิตฺตโต จ สมุฏฺฐาติ. (10)
เภทกานุวตฺตกานํ ภิกฺขูนํ ยาวตติยํ สมนุภาสนาย น ปฏินิสฺสชฺชนฺตานํ สํฆาทิเสโส กติหิ สมุฏฺฐาเนหิ สมุฏฺฐาติ? เภทกานุวตฺตกานํ ภิกฺขูนํ ยาวตติยํ สมนุภาสนาย น ปฏินิสฺสชฺชนฺตานํ สํฆาทิเสโส เอเกน สมุฏฺฐาเนน สมุฏฺฐาติ— กายโต จ วาจโต จ จิตฺตโต จ สมุฏฺฐาติ. (11)
ทุพฺพจสฺส ภิกฺขุโน ยาวตติยํ สมนุภาสนาย น ปฏินิสฺสชฺชนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? ทุพฺพจสฺส ภิกฺขุโน ยาวตติยํ สมนุภาสนาย น ปฏินิสฺสชฺชนฺตสฺส สํฆาทิเสโส เอเกน สมุฏฺฐาเนน สมุฏฺฐาติ— กายโต จ วาจโต จ จิตฺตโต จ สมุฏฺฐาติ. (12)
กุลทูสกสฺส ภิกฺขุโน ยาวตติยํ สมนุภาสนาย น ปฏินิสฺสชฺชนฺตสฺส สํฆาทิเสโส กติหิ สมุฏฺฐาเนหิ สมุฏฺฐาติ? กุลทูสกสฺส ภิกฺขุโน ยาวตติยํ สมนุภาสนาย น ปฏินิสฺสชฺชนฺตสฺส สํฆาทิเสโส เอเกน สมุฏฺฐาเนน สมุฏฺฐาติ— กายโต จ วาจโต จ จิตฺตโต จ สมุฏฺฐาติ. (13)
เตรส สํฆาทิเสสา นิฏฺฐิตา.