19.1 กายิกาทิอาปตฺติ
กติ อาปตฺติโย กายิกา,
กติ วาจสิกา กตา;
ฉาเทนฺตสฺส กติ อาปตฺติโย,
กติ สํสคฺคปจฺจยา.
ฉาปตฺติโย กายิกา,
ฉ วาจสิกา กตา;
ฉาเทนฺตสฺส ติโสฺส อาปตฺติโย,
ปญฺจ สํสคฺคปจฺจยา.
อรุณุคฺเค กติ อาปตฺติโย,
กติ ยาวตติยกา;
กเตตฺถ อฏฺฐ วตฺถุกา,
กติหิ สพฺพสงฺคโห.
อรุณุคฺเค ติโสฺส อาปตฺติโย,
ทฺเว ยาวตติยกา;
เอเกตฺถ อฏฺฐ วตฺถุกา,
เอเกน สพฺพสงฺคโห.
วินยสฺส กติ มูลานิ,
ยานิ พุทฺเธน ปญฺญตฺตา;
วินยครุกา กติ วุตฺตา,
ทุฏฺฐุลฺลจฺฉาทนา กติ.
วินยสฺส ทฺเว มูลานิ,
ยานิ พุทฺเธน ปญฺญตฺตา;
วินยครุกา ทฺเว วุตฺตา,
ทฺเว ทุฏฺฐุลฺลจฺฉาทนา.
คามนฺตเร กติ อาปตฺติโย,
กติ นทิปารปจฺจยา;
กติมํเสสุ ถุลฺลจฺจยํ,
กติมํเสสุ ทุกฺกฏํ.
คามนฺตเร จตโสฺส อาปตฺติโย,
จตโสฺส นทิปารปจฺจยา;
เอกมํเส ถุลฺลจฺจยํ,
นวมํเสสุ ทุกฺกฏํ.
กติ วาจสิกา รตฺติํ,
กติ วาจสิกา ทิวา;
ททมานสฺส กติ อาปตฺติโย,
ปฏิคฺคณฺหนฺตสฺส กิตฺตกา.
ทฺเว วาจสิกา รตฺติํ,
ทฺเว วาจสิกา ทิวา;
ททมานสฺส ติโสฺส อาปตฺติโย,
จตฺตาโร จ ปฏิคฺคเห.