19.2 เทสนาคามินิยาทิอาปตฺติ
กติ เทสนาคามินิโย,
กติ สปฺปฏิกมฺมา กตา;
กเตตฺถ อปฺปฏิกมฺมา วุตฺตา,
พุทฺเธนาทิจฺจพนฺธุนา.
ปญฺจ เทสนาคามินิโย,
ฉ สปฺปฏิกมฺมา กตา;
เอเกตฺถ อปฺปฏิกมฺมา วุตฺตา,
พุทฺเธนาทิจฺจพนฺธุนา.
วินยครุกา กติ วุตฺตา,
กายวาจสิกานิ จ;
กติ วิกาเล ธญฺญรโส,
กติ ญตฺติจตุตฺเถน สมฺมุติ.
วินยครุกา ทฺเว วุตฺตา,
กายวาจสิกานิ จ;
เอโก วิกาเล ธญฺญรโส,
เอกา ญตฺติจตุตฺเถน สมฺมุติ.
ปาราชิกา กายิกา กติ,
กติ สํวาสกภูมิโย;
กตินํ รตฺติจฺเฉโท,
ปญฺญตฺตา ทฺวงฺคุลา กติ.
ปาราชิกา กายิกา ทฺเว,
ทฺเว สํวาสกภูมิโย;
ทฺวินฺนํ รตฺติจฺเฉโท,
ปญฺญตฺตา ทฺวงฺคุลา ทุเว.
กตตฺตานํ วธิตฺวาน,
กติหิ สํโฆ ภิชฺชติ;
กเตตฺถ ปฐมาปตฺติกา,
ญตฺติยา กรณา กติ.
ทฺเว อตฺตานํ วธิตฺวาน,
ทฺวีหิ สํโฆ ภิชฺชติ;
ทฺเวตฺถ ปฐมาปตฺติกา,
ญตฺติยา กรณา ทุเว.
ปาณาติปาเต กติ อาปตฺติโย,
วาจา ปาราชิกา กติ;
โอภาสนา กติ วุตฺตา,
สญฺจริตฺเตน วา กติ.
ปาณาติปาเต ติโสฺส อาปตฺติโย,
วาจา ปาราชิกา ตโย;
โอภาสนา ตโย วุตฺตา,
สญฺจริตฺเตน วา ตโย.
กติ ปุคฺคลา น อุปสมฺปาเทตพฺพา,
กติ กมฺมานํ สงฺคหา;
นาสิตกา กติ วุตฺตา,
กตินํ เอกวาจิกา.
ตโย ปุคฺคลา น อุปสมฺปาเทตพฺพา,
ตโย กมฺมานํ สงฺคหา;
นาสิตกา ตโย วุตฺตา,
ติณฺณนฺนํ เอกวาจิกา.
อทินฺนาทาเน กติ อาปตฺติโย,
กติ เมถุนปจฺจยา;
ฉินฺทนฺตสฺส กติ อาปตฺติโย,
กติ ฉฑฺฑิตปจฺจยา.
อทินฺนาทาเน ติโสฺส อาปตฺติโย,
จตโสฺส เมถุนปจฺจยา;
ฉินฺทนฺตสฺส ติโสฺส อาปตฺติโย,
ปญฺจ ฉฑฺฑิตปจฺจยา.
ภิกฺขุโนวาทกวคฺคสฺมิํ,
ปาจิตฺติเยน ทุกฺกฏา;
กเตตฺถ นวกา วุตฺตา,
กตินํ จีวเรน จ.
ภิกฺขุโนวาทกวคฺคสฺมิํ,
ปาจิตฺติเยน ทุกฺกฏา กตา;
จตุเรตฺถ นวกา วุตฺตา,
ทฺวินฺนํ จีวเรน จ.
ภิกฺขุนีนญฺจ อกฺขาตา,
ปาฏิเทสนิยา กติ;
ภุญฺชนฺตามกธญฺเญน,
ปาจิตฺติเยน ทุกฺกฏา กติ.
ภิกฺขุนีนญฺจ อกฺขาตา,
อฏฺฐ ปาฏิเทสนียา กตา;
ภุญฺชนฺตามกธญฺเญน,
ปาจิตฺติเยน ทุกฺกฏา กตา.
คจฺฉนฺตสฺส กติ อาปตฺติโย,
ฐิตสฺส จาปิ กิตฺตกา;
นิสินฺนสฺส กติ อาปตฺติโย,
นิปนฺนสฺสาปิ กิตฺตกา.
คจฺฉนฺตสฺส จตโสฺส อาปตฺติโย,
ฐิตสฺส จาปิ ตตฺตกา;
นิสินฺนสฺส จตโสฺส อาปตฺติโย,
นิปนฺนสฺสาปิ ตตฺตกา.