3.1 สมุฏฺฐานสฺสุทฺทาน
257.
1076
อนิจฺจา สพฺเพ สงฺขารา,
ทุกฺขานตฺตา จ สงฺขตา;
นิพฺพานญฺเจว ปญฺญตฺติ,
อนตฺตา อิติ นิจฺฉยา.
1077
พุทฺธจนฺเท อนุปฺปนฺเน,
พุทฺธาทิจฺเจ อนุคฺคเต;
เตสํ สภาคธมฺมานํ,
นามมตฺตํ น นายติ.
1078
ทุกฺกรํ วิวิธํ กตฺวา,
ปูรยิตฺวาน ปารมี;
อุปฺปชฺชนฺติ มหาวีรา,_
จกฺขุภูตา สพฺรหฺมเก.
1079
เต เทสยนฺติ สทฺธมฺมํ,
ทุกฺขหานิํ สุขาวหํ;
องฺคีรโส สกฺยมุนิ,
สพฺพภูตานุกมฺปโก.
1080
สพฺพสตฺตุตฺตโม สีโห,
ปิฏเก ตีณิ เทสยิ;
สุตฺตนฺตมภิธมฺมญฺจ,
วินยญฺจ มหาคุณํ.
1081
เอวํ นียติ สทฺธมฺโม,
วินโย ยทิ ติฏฺฐติ;
อุภโต จ วิภงฺคานิ,_
ขนฺธกา ยา จ มาติกา.
1082
มาลา สุตฺตคุเณเนว,
ปริวาเรน คนฺถิตา;
ตเสฺสว ปริวารสฺส,
สมุฏฺฐานํ นิยโต กตํ.
1083
สมฺเภทํ นิทานญฺจญฺญํ,
สุตฺเต ทิสฺสนฺติ อุปริ;
ตสฺมา สิกฺเข ปริวารํ,
ธมฺมกาโม สุเปสโลติ.