7.10 ทสกวาร
ทส อาฆาตวตฺถูนิ. ทส อาฆาตปฏิวินยา. ทส วินีตวตฺถูนิ. ทสวตฺถุกา มิจฺฉาทิฏฺฐิ. ทสวตฺถุกา สมฺมาทิฏฺฐิ. ทส อนฺตคฺคาหิกา ทิฏฺฐิ. ทส มิจฺฉตฺตา. ทส สมฺมตฺตา. ทส อกุสลกมฺมปถา. ทส กุสลกมฺมปถา. ทส อธมฺมิกา สลากคฺคาหา. ทส ธมฺมิกา สลากคฺคาหา. สามเณรานํ ทส สิกฺขาปทานิ. ทสหงฺเคหิ สมนฺนาคโต สามเณโร นาเสตพฺโพ.
ทสหงฺเคหิ สมนฺนาคโต วินยธโร “พาโล” เตฺวว สงฺขํ คจฺฉติ— อตฺตโน ภาสปริยนฺตํ น อุคฺคณฺหาติ, ปรสฺส ภาสปริยนฺตํ น อุคฺคณฺหาติ, อตฺตโน ภาสปริยนฺตํ อนุคฺคเหตฺวา ปรสฺส ภาสปริยนฺตํ อนุคฺคเหตฺวา อธมฺเมน กาเรติ, อปฺปฏิญฺญาย อาปตฺติํ น ชานาติ, อาปตฺติยา มูลํ น ชานาติ, อาปตฺติสมุทยํ น ชานาติ, อาปตฺตินิโรธํ น ชานาติ, อาปตฺตินิโรธคามินิํ ปฏิปทํ น ชานาติ.
ทสหงฺเคหิ สมนฺนาคโต วินยธโร “ปณฺฑิโต” เตฺวว สงฺขํ คจฺฉติ— อตฺตโน ภาสปริยนฺตํ อุคฺคณฺหาติ, ปรสฺส ภาสปริยนฺตํ อุคฺคณฺหาติ, อตฺตโน ภาสปริยนฺตํ อุคฺคเหตฺวา ปรสฺส ภาสปริยนฺตํ อุคฺคเหตฺวา ธมฺเมน กาเรติ, ปฏิญฺญาย อาปตฺติํ ชานาติ, อาปตฺติยา มูลํ ชานาติ, อาปตฺติสมุทยํ ชานาติ, อาปตฺตินิโรธํ ชานาติ, อาปตฺตินิโรธคามินิํ ปฏิปทํ ชานาติ.
อปเรหิปิ ทสหงฺเคหิ สมนฺนาคโต วินยธโร “พาโล” เตฺวว สงฺขํ คจฺฉติ— อธิกรณํ น ชานาติ, อธิกรณสฺส มูลํ น ชานาติ, อธิกรณสมุทยํ น ชานาติ, อธิกรณนิโรธํ น ชานาติ, อธิกรณนิโรธคามินิํ ปฏิปทํ น ชานาติ, วตฺถุํ น ชานาติ, นิทานํ น ชานาติ, ปญฺญตฺติํ น ชานาติ, อนุปญฺญตฺติํ น ชานาติ, อนุสนฺธิวจนปถํ น ชานาติ.
ทสหงฺเคหิ สมนฺนาคโต วินยธโร “ปณฺฑิโต” เตฺวว สงฺขํ คจฺฉติ— อธิกรณํ ชานาติ, อธิกรณสฺส มูลํ ชานาติ, อธิกรณสมุทยํ ชานาติ, อธิกรณนิโรธํ ชานาติ, อธิกรณนิโรธคามินิํ ปฏิปทํ ชานาติ, วตฺถุํ ชานาติ, นิทานํ ชานาติ, ปญฺญตฺติํ ชานาติ, อนุปญฺญตฺติํ ชานาติ, อนุสนฺธิวจนปถํ ชานาติ.
อปเรหิปิ ทสหงฺเคหิ สมนฺนาคโต วินยธโร “พาโล” เตฺวว สงฺขํ คจฺฉติ— ญตฺติํ น ชานาติ, ญตฺติยา กรณํ น ชานาติ, น ปุพฺพกุสโล โหติ, น อปรกุสโล โหติ, อกาลญฺญู จ โหติ, อาปตฺตานาปตฺติํ น ชานาติ, ลหุกครุกํ อาปตฺติํ น ชานาติ, สาวเสสานวเสสํ อาปตฺติํ น ชานาติ, ทุฏฺฐุลฺลาทุฏฺฐุลฺลํ อาปตฺติํ น ชานาติ, อาจริยปรมฺปรา โข ปนสฺส น สุคฺคหิตา โหติ น สุมนสิกตา น สูปธาริตา.
ทสหงฺเคหิ สมนฺนาคโต วินยธโร “ปณฺฑิโต” เตฺวว สงฺขํ คจฺฉติ— ญตฺติํ ชานาติ, ญตฺติยา กรณํ ชานาติ, ปุพฺพกุสโล โหติ, อปรกุสโล โหติ, กาลญฺญู จ โหติ, อาปตฺตานาปตฺติํ ชานาติ, ลหุกครุกํ อาปตฺติํ ชานาติ, สาวเสสานวเสสํ อาปตฺติํ ชานาติ, ทุฏฺฐุลฺลาทุฏฺฐุลฺลํ อาปตฺติํ ชานาติ, อาจริยปรมฺปรา โข ปนสฺส สุคฺคหิตา โหติ สุมนสิกตา สูปธาริตา.
อปเรหิปิ ทสหงฺเคหิ สมนฺนาคโต วินยธโร “พาโล” เตฺวว สงฺขํ คจฺฉติ— อาปตฺตานาปตฺติํ น ชานาติ, ลหุกครุกํ อาปตฺติํ น ชานาติ, สาวเสสานวเสสํ อาปตฺติํ น ชานาติ, ทุฏฺฐุลฺลาทุฏฺฐุลฺลํ อาปตฺติํ น ชานาติ, อุภยานิ โข ปนสฺส ปาติโมกฺขานิ วิตฺถาเรน น สฺวาคตานิ โหนฺติ น สุวิภตฺตานิ น สุปฺปวตฺตีนิ น สุวินิจฺฉิตานิ สุตฺตโส อนุพฺยญฺชนโส, อาปตฺตานาปตฺติํ น ชานาติ, ลหุกครุกํ อาปตฺติํ น ชานาติ, สาวเสสานวเสสํ อาปตฺติํ น ชานาติ, ทุฏฺฐุลฺลาทุฏฺฐุลฺลํ อาปตฺติํ น ชานาติ, อธิกรเณ จ น วินิจฺฉยกุสโล โหติ.
ทสหงฺเคหิ สมนฺนาคโต วินยธโร “ปณฺฑิโต” เตฺวว สงฺขํ คจฺฉติ— อาปตฺตานาปตฺติํ ชานาติ, ลหุกครุกํ อาปตฺติํ ชานาติ, สาวเสสานวเสสํ อาปตฺติํ ชานาติ, ทุฏฺฐุลฺลาทุฏฺฐุลฺลํ อาปตฺติํ ชานาติ, อุภยานิ โข ปนสฺส ปาติโมกฺขานิ วิตฺถาเรน สฺวาคตานิ โหนฺติ สุวิภตฺตานิ สุปฺปวตฺตีนิ สุวินิจฺฉิตานิ สุตฺตโส อนุพฺยญฺชนโส, อาปตฺตานาปตฺติํ ชานาติ, ลหุกครุกํ อาปตฺติํ ชานาติ, สาวเสสานวเสสํ อาปตฺติํ ชานาติ, ทุฏฺฐุลฺลาทุฏฺฐุลฺลํ อาปตฺติํ ชานาติ, อธิกรเณ จ วินิจฺฉยกุสโล โหติ.
ทสหงฺเคหิ สมนฺนาคโต ภิกฺขุ อุพฺพาหิกาย สมฺมนฺนิตพฺโพ. ทส อตฺถวเส ปฏิจฺจ ตถาคเตน สาวกานํ สิกฺขาปทํ ปญฺญตฺตํ. ทส อาทีนวา ราชนฺเตปุรปฺปเวสเน. ทส ทานวตฺถูนิ. ทส รตนานิ. ทสวคฺโค ภิกฺขุสํโฆ. ทสวคฺเคน คเณน อุปสมฺปาเทตพฺพํ. ทส ปํสุกูลานิ. ทส จีวรธารณา. ทสาหปรมํ อติเรกจีวรํ ธาเรตพฺพํ. ทส สุกฺกานิ. ทส อิตฺถิโย. ทส ภริยาโย. เวสาลิยา ทส วตฺถูนิ ทีเปนฺติ. ทส ปุคฺคลา อวนฺทิยา. ทส อกฺโกสวตฺถูนิ. ทสหากาเรหิ เปสุญฺญํ อุปสํหรติ. ทส เสนาสนานิ. ทส วรานิ ยาจิํสุ. ทส อธมฺมิกานิ ปาติโมกฺขฏฺฐปนานิ. ทส ธมฺมิกานิ ปาติโมกฺขฏฺฐปนานิ. ทสานิสํสา ยาคุยา. ทส มํสา อกปฺปิยา. ทส ปรมานิ. ทสวเสฺสน ภิกฺขุนา พฺยตฺเตน ปฏิพเลน ปพฺพาเชตพฺพํ อุปสมฺปาเทตพฺพํ นิสฺสโย ทาตพฺโพ สามเณโร อุปฏฺฐาเปตพฺโพ. ทสวสฺสาย ภิกฺขุนิยา พฺยตฺตาย ปฏิพลาย ปพฺพาเชตพฺพํ อุปสมฺปาเทตพฺพํ นิสฺสโย ทาตพฺโพ สามเณรี อุปฏฺฐาเปตพฺพา. ทสวสฺสาย ภิกฺขุนิยา พฺยตฺตาย ปฏิพลาย วุฏฺฐาปนสมฺมุติ สาทิตพฺพา. ทสวสฺสาย คิหิคตาย สิกฺขา ทาตพฺพาติ.
ทสกํ นิฏฺฐิตํ.
ตสฺสุทฺทานํ
อาฆาตํ วินยํ วตฺถุ,
มิจฺฉา สมฺมา จ อนฺตคา;
มิจฺฉตฺตา เจว สมฺมตฺตา,
อกุสลา กุสลาปิ จ.
สลากา อธมฺมา ธมฺมา,
สามเณรา จ นาสนา;
ภาสาธิกรณญฺเจว,
ญตฺติลหุกเมว จ.
ลหุกา ครุกา เอเต,
กณฺหสุกฺกา วิชานถ;
อุพฺพาหิกา จ สิกฺขา จ,_
อนฺเตปุเร จ วตฺถูนิ.
รตนํ ทสวคฺโค จ,
ตเถว อุปสมฺปทา;
ปํสุกูลธารณา จ,
ทสาหสุกฺไกตฺถิโย.
ภริยา ทส วตฺถูนิ,
อวนฺทิยกฺโกเสน จ;
เปสุญฺญญฺเจว เสนานิ,
วรานิ จ อธมฺมิกา.
ธมฺมิกา ยาคุมํสา จ,
ปรมา ภิกฺขุ ภิกฺขุนี;
วุฏฺฐาปนา คิหิคตา,
ทสกา สุปฺปกาสิตาติ.