7.2 ทุกวาร
อตฺถาปตฺติ สญฺญา วิโมกฺขา, อตฺถาปตฺติ โน สญฺญาวิโมกฺขา. อตฺถาปตฺติ ลทฺธสมาปตฺติกสฺส, อตฺถาปตฺติ น ลทฺธสมาปตฺติกสฺส. อตฺถาปตฺติ สทฺธมฺมปฏิสญฺญุตฺตา, อตฺถาปตฺติ อสทฺธมฺมปฏิสญฺญุตฺตา. อตฺถาปตฺติ สปริกฺขารปฏิสญฺญุตฺตา, อตฺถาปตฺติ ปรปริกฺขารปฏิสญฺญุตฺตา. อตฺถาปตฺติ สปุคฺคลปฏิสญฺญุตฺตา, อตฺถาปตฺติ ปรปุคฺคลปฏิสญฺญุตฺตา. อตฺถิ สจฺจํ ภณนฺโต ครุกํ อาปตฺติํ อาปชฺชติ, มุสา ภณนฺโต ลหุกํ. อตฺถิ มุสา ภณนฺโต ครุกํ อาปตฺติํ อาปชฺชติ, สจฺจํ ภณนฺโต ลหุกํ. อตฺถาปตฺติ ภูมิคโต อาปชฺชติ, โน เวหาสคโต. อตฺถาปตฺติ เวหาสคโต อาปชฺชติ, โน ภูมิคโต. อตฺถาปตฺติ นิกฺขมนฺโต อาปชฺชติ, โน ปวิสนฺโต. อตฺถาปตฺติ ปวิสนฺโต อาปชฺชติ, โน นิกฺขมนฺโต. อตฺถาปตฺติ อาทิยนฺโต อาปชฺชติ, อตฺถาปตฺติ อนาทิยนฺโต อาปชฺชติ. อตฺถาปตฺติ สมาทิยนฺโต อาปชฺชติ, อตฺถาปตฺติ น สมาทิยนฺโต อาปชฺชติ. อตฺถาปตฺติ กโรนฺโต อาปชฺชติ, อตฺถาปตฺติ น กโรนฺโต อาปชฺชติ. อตฺถาปตฺติ เทนฺโต อาปชฺชติ, อตฺถาปตฺติ น เทนฺโต อาปชฺชติ. อตฺถาปตฺติ เทเสนฺโต อาปชฺชติ, อตฺถาปตฺติ น เทเสนฺโต อาปชฺชติ. อตฺถาปตฺติ ปฏิคฺคณฺหนฺโต อาปชฺชติ, อตฺถาปตฺติ น ปฏิคฺคณฺหนฺโต อาปชฺชติ. อตฺถาปตฺติ ปริโภเคน อาปชฺชติ, อตฺถาปตฺติ น ปริโภเคน อาปชฺชติ. อตฺถาปตฺติ รตฺติํ อาปชฺชติ, โน ทิวา. อตฺถาปตฺติ ทิวา อาปชฺชติ, โน รตฺติํ. อตฺถาปตฺติ อรุณุคฺเค อาปชฺชติ, อตฺถาปตฺติ น อรุณุคฺเค อาปชฺชติ. อตฺถาปตฺติ ฉินฺทนฺโต อาปชฺชติ, อตฺถาปตฺติ น ฉินฺทนฺโต อาปชฺชติ. อตฺถาปตฺติ ฉาเทนฺโต อาปชฺชติ, อตฺถาปตฺติ น ฉาเทนฺโต อาปชฺชติ. อตฺถาปตฺติ ธาเรนฺโต อาปชฺชติ, อตฺถาปตฺติ น ธาเรนฺโต อาปชฺชติ.
ทฺเว อุโปสถา— จาตุทฺทสิโก จ ปนฺนรสิโก จ. ทฺเว ปวารณา— จาตุทฺทสิกา จ ปนฺนรสิกา จ. ทฺเว กมฺมานิ— อปโลกนกมฺมํ, ญตฺติกมฺมํ. อปรานิปิ ทฺเว กมฺมานิ— ญตฺติทุติยกมฺมํ, ญตฺติจตุตฺถกมฺมํ. ทฺเว กมฺมวตฺถูนิ— อปโลกนกมฺมสฺส วตฺถุ, ญตฺติกมฺมสฺส วตฺถุ. อปรานิปิ ทฺเว กมฺมวตฺถูนิ— ญตฺติทุติยกมฺมสฺส วตฺถุ, ญตฺติจตุตฺถกมฺมสฺส วตฺถุ. ทฺเว กมฺมโทสา— อปโลกนกมฺมสฺส โทโส, ญตฺติกมฺมสฺส โทโส. อปเรปิ ทฺเว กมฺมโทสา— ญตฺติทุติยกมฺมสฺส โทโส, ญตฺติจตุตฺถกมฺมสฺส โทโส. ทฺเว กมฺมสมฺปตฺติโย— อปโลกนกมฺมสฺส สมฺปตฺติ, ญตฺติกมฺมสฺส สมฺปตฺติ. อปราปิ ทฺเว กมฺมสมฺปตฺติโย— ญตฺติทุติยกมฺมสฺส สมฺปตฺติ, ญตฺติจตุตฺถกมฺมสฺส สมฺปตฺติ. ทฺเว นานาสํวาสกภูมิโย— อตฺตนา วา อตฺตานํ นานาสํวาสกํ กโรติ, สมคฺโค วา นํ สํโฆ อุกฺขิปติ อทสฺสเน วา อปฺปฏิกมฺเม วา อปฺปฏินิสฺสคฺเค วา. ทฺเว สมานสํวาสกภูมิโย— อตฺตนา วา อตฺตานํ สมานสํวาสกํ กโรติ, สมคฺโค วา นํ สํโฆ อุกฺขิตฺตํ โอสาเรติ ทสฺสเน วา ปฏิกมฺเม วา ปฏินิสฺสคฺเค วา. ทฺเว ปาราชิกา— ภิกฺขูนญฺจ ภิกฺขุนีนญฺจ. ทฺเว สํฆาทิเสสา, ทฺเว ถุลฺลจฺจยา, ทฺเว ปาจิตฺติยา, ทฺเว ปาฏิเทสนียา, ทฺเว ทุกฺกฏา, ทฺเว ทุพฺภาสิตา— ภิกฺขูนญฺจ ภิกฺขุนีนญฺจ. สตฺต อาปตฺติโย, สตฺต อาปตฺติกฺขนฺธา. ทฺวีหากาเรหิ สํโฆ ภิชฺชติ— กมฺเมน วา สลากคฺคาเหน วา.
ทฺเว ปุคฺคลา น อุปสมฺปาเทตพฺพา— อทฺธานหีโน, องฺคหีโน. อปเรปิ ทฺเว ปุคฺคลา น อุปสมฺปาเทตพฺพา— วตฺถุวิปนฺโน, กรณทุกฺกฏโก. อปเรปิ ทฺเว ปุคฺคลา น อุปสมฺปาเทตพฺพา— อปริปูโร ปริปูโร โน จ ยาจติ. ทฺวินฺนํ ปุคฺคลานํ นิสฺสาย น วตฺถพฺพํ— อลชฺชิสฺส จ พาลสฺส จ. ทฺวินฺนํ ปุคฺคลานํ นิสฺสโย น ทาตพฺโพ— อลชฺชิสฺส จ ลชฺชิโน จ น ยาจติ. ทฺวินฺนํ ปุคฺคลานํ นิสฺสโย ทาตพฺโพ— พาลสฺส จ ลชฺชิสฺส จ ยาจติ. ทฺเว ปุคฺคลา อภพฺพา อาปตฺติํ อาปชฺชิตุํ— พุทฺธา จ ปจฺเจกพุทฺธา จ. ทฺเว ปุคฺคลา ภพฺพา, อาปตฺติํ อาปชฺชิตุํ— ภิกฺขู จ ภิกฺขุนิโย จ. ทฺเว ปุคฺคลา อภพฺพา สญฺจิจฺจ อาปตฺติํ อาปชฺชิตุํ— ภิกฺขู จ ภิกฺขุนิโย จ อริยปุคฺคลา. ทฺเว ปุคฺคลา ภพฺพา สญฺจิจฺจ อาปตฺติํ อาปชฺชิตุํ— ภิกฺขู จ ภิกฺขุนิโย จ ปุถุชฺชนา. ทฺเว ปุคฺคลา อภพฺพา สญฺจิจฺจ สาติสารํ วตฺถุํ อชฺฌาจริตุํ— ภิกฺขู จ ภิกฺขุนิโย จ อริยปุคฺคลา. ทฺเว ปุคฺคลา ภพฺพา สญฺจิจฺจ สาติสารํ วตฺถุํ อชฺฌาจริตุํ— ภิกฺขู จ ภิกฺขุนิโย จ ปุถุชฺชนา.
ทฺเว ปฏิกฺโกสา— กาเยน วา ปฏิกฺโกสติ วาจาย วา ปฏิกฺโกสติ. ทฺเว นิสฺสารณา— อตฺถิ ปุคฺคโล อปฺปตฺโต นิสฺสารณํ ตญฺเจ สํโฆ นิสฺสาเรติ เอกจฺโจ สุนิสฺสาริโต, เอกจฺโจ ทุนฺนิสฺสาริโต. ทฺเว โอสารณา— อตฺถิ ปุคฺคโล อปฺปตฺโต โอสารณํ ตญฺเจ สํโฆ โอสาเรติ เอกจฺโจ โสสาริโต, เอกจฺโจ โทสาริโต. ทฺเว ปฏิญฺญา— กาเยน วา ปฏิชานาติ วาจาย วา ปฏิชานาติ. ทฺเว ปฏิคฺคหา— กาเยน วา ปฏิคฺคณฺหาติ กายปฏิพทฺเธน วา ปฏิคฺคณฺหาติ. ทฺเว ปฏิกฺเขปา— กาเยน วา ปฏิกฺขิปติ วาจาย วา ปฏิกฺขิปติ. ทฺเว อุปฆาติกา— สิกฺขูปฆาติกา จ โภคูปฆาติกา จ. ทฺเว โจทนา— กาเยน วา โจเทติ วาจาย วา โจเทติ. ทฺเว กถินสฺส ปลิโพธา— อาวาสปลิโพโธ จ จีวรปลิโพโธ จ. ทฺเว กถินสฺส อปลิโพธา— อาวาสอปลิโพโธ จ จีวรอปลิโพโธ จ. ทฺเว จีวรานิ— คหปติกญฺจ ปํสุกูลญฺจ. ทฺเว ปตฺตา— อโยปตฺโต มตฺติกาปตฺโต. ทฺเว มณฺฑลานิ— ติปุมยํ, สีสมยํ. ทฺเว ปตฺตสฺส อธิฏฺฐานา— กาเยน วา อธิฏฺเฐติ วาจาย วา อธิฏฺเฐติ. ทฺเว จีวรสฺส อธิฏฺฐานา— กาเยน วา อธิฏฺเฐติ วาจาย วา อธิฏฺเฐติ. ทฺเว วิกปฺปนา— สมฺมุขาวิกปฺปนา จ ปรมฺมุขาวิกปฺปนา จ. ทฺเว วินยา— ภิกฺขูนญฺจ ภิกฺขุนีนญฺจ. ทฺเว เวนยิกา— ปญฺญตฺตญฺจ ปญฺญตฺตานุโลมญฺจ. ทฺเว วินยสฺส สเลฺลขา— อกปฺปิเย เสตุฆาโต, กปฺปิเย มตฺตการิตา. ทฺวีหากาเรหิ อาปตฺติํ อาปชฺชติ— กาเยน วา อาปชฺชติ วาจาย วา อาปชฺชติ. ทฺวีหากาเรหิ อาปตฺติยา วุฏฺฐาติ— กาเยน วา วุฏฺฐาติ วาจาย วา วุฏฺฐาติ. ทฺเว ปริวาสา— ปฏิจฺฉนฺนปริวาโส, อปฺปฏิจฺฉนฺนปริวาโส. อปเรปิ ทฺเว ปริวาสา— สุทฺธนฺตปริวาโส สโมธานปริวาโส. ทฺเว มานตฺตา— ปฏิจฺฉนฺนมานตฺตํ, อปฺปฏิจฺฉนฺนมานตฺตํ. อปเรปิ ทฺเว มานตฺตา— ปกฺขมานตฺตํ, สโมธานมานตฺตํ. ทฺวินฺนํ ปุคฺคลานํ รตฺติจฺเฉโท— ปาริวาสิกสฺส จ มานตฺตจาริกสฺส จ. ทฺเว อนาทริยานิ— ปุคฺคลานาทริยญฺจ ธมฺมานาทริยญฺจ. ทฺเว โลณานิ— ชาติมญฺจ การิมญฺจ. อปรานิปิ ทฺเว โลณานิ— สามุทฺทํ กาฬโลณํ. อปรานิปิ ทฺเว โลณานิ— สินฺธวํ, อุพฺภิทํ. อปรานิปิ ทฺเว โลณานิ— โรมกํ, ปกฺกาลกํ. ทฺเว ปริโภคา— อพฺภนฺตรปริโภโค จ พาหิรปริโภโค จ. ทฺเว อกฺโกสา— หีโน จ อกฺโกโส อุกฺกฏฺโฐ จ อกฺโกโส. ทฺวีหากาเรหิ เปสุญฺญํ โหติ— ปิยกมฺยสฺส วา เภทาธิปฺปายสฺส วา. ทฺวีหากาเรหิ คณโภชนํ ปสวติ— นิมนฺตนโต วา วิญฺญตฺติโต วา. ทฺเว วสฺสูปนายิกา— ปุริมิกา, ปจฺฉิมิกา. ทฺเว อธมฺมิกานิ ปาติโมกฺขฏฺฐปนานิ. ทฺเว ธมฺมิกานิ ปาติโมกฺขฏฺฐปนานิ.
ทฺเว ปุคฺคลา พาลา— โย จ อนาคตํ ภารํ วหติ, โย จ อาคตํ ภารํ น วหติ. ทฺเว ปุคฺคลา ปณฺฑิตา— โย จ อนาคตํ ภารํ น วหติ, โย จ อาคตํ ภารํ วหติ. อปเรปิ ทฺเว ปุคฺคลา พาลา— โย จ อกปฺปิเย กปฺปิยสญฺญี, โย จ กปฺปิเย อกปฺปิยสญฺญี. ทฺเว ปุคฺคลา ปณฺฑิตา— โย จ อกปฺปิเย อกปฺปิยสญฺญี, โย จ กปฺปิเย กปฺปิยสญฺญี. อปเรปิ ทฺเว ปุคฺคลา พาลา— โย จ อนาปตฺติยา อาปตฺติสญฺญี, โย จ อาปตฺติยา อนาปตฺติสญฺญี. ทฺเว ปุคฺคลา ปณฺฑิตา— โย จ อาปตฺติยา อาปตฺติสญฺญี, โย จ อนาปตฺติยา อนาปตฺติสญฺญี. อปเรปิ ทฺเว ปุคฺคลา พาลา— โย จ อธมฺเม ธมฺมสญฺญี, โย จ ธมฺเม อธมฺมสญฺญี. ทฺเว ปุคฺคลา ปณฺฑิตา— โย จ อธมฺเม อธมฺมสญฺญี, โย จ ธมฺเม ธมฺมสญฺญี. อปเรปิ ทฺเว ปุคฺคลา พาลา— โย จ อวินเย วินยสญฺญี, โย จ วินเย อวินยสญฺญี. ทฺเว ปุคฺคลา ปณฺฑิตา— โย จ อวินเย อวินยสญฺญี, โย จ วินเย วินยสญฺญี.
ทฺวินฺนํ ปุคฺคลานํ อาสวา วฑฺฒนฺติ— โย จ น กุกฺกุจฺจายิตพฺพํ กุกฺกุจฺจายติ, โย จ กุกฺกุจฺจายิตพฺพํ น กุกฺกุจฺจายติ. ทฺวินฺนํ ปุคฺคลานํ อาสวา น วฑฺฒนฺติ— โย จ น กุกฺกุจฺจายิตพฺพํ น กุกฺกุจฺจายติ, โย จ กุกฺกุจฺจายิตพฺพํ กุกฺกุจฺจายติ. อปเรสมฺปิ ทฺวินฺนํ ปุคฺคลานํ อาสวา วฑฺฒนฺติ— โย จ อกปฺปิเย กปฺปิยสญฺญี, โย จ กปฺปิเย อกปฺปิยสญฺญี. ทฺวินฺนํ ปุคฺคลานํ อาสวา น วฑฺฒนฺติ— โย จ อกปฺปิเย อกปฺปิยสญฺญี, โย จ กปฺปิเย กปฺปิยสญฺญี. อปเรสมฺปิ ทฺวินฺนํ ปุคฺคลานํ อาสวา วฑฺฒนฺติ— โย จ อนาปตฺติยา อาปตฺติสญฺญี, โย จ อาปตฺติยา อนาปตฺติสญฺญี. ทฺวินฺนํ ปุคฺคลานํ อาสวา น วฑฺฒนฺติ— โย จ อนาปตฺติยา อนาปตฺติสญฺญี, โย จ อาปตฺติยา อาปตฺติสญฺญี. อปเรสมฺปิ ทฺวินฺนํ ปุคฺคลานํ อาสวา วฑฺฒนฺติ— โย จ อธมฺเม ธมฺมสญฺญี, โย จ ธมฺเม อธมฺมสญฺญี. ทฺวินฺนํ ปุคฺคลานํ อาสวา น วฑฺฒนฺติ— โย จ อธมฺเม อธมฺมสญฺญี, โย จ ธมฺเม ธมฺมสญฺญี. อปเรสมฺปิ ทฺวินฺนํ ปุคฺคลานํ อาสวา วฑฺฒนฺติ— โย จ อวินเย วินยสญฺญี, โย จ วินเย อวินยสญฺญี. ทฺวินฺนํ ปุคฺคลานํ อาสวา น วฑฺฒนฺติ— โย จ อวินเย อวินยสญฺญี, โย จ วินเย วินยสญฺญี.
ทุกา นิฏฺฐิตา.
ตสฺสุทฺทานํ
สญฺญา ลทฺธา จ สทฺธมฺมา,
ปริกฺขารา จ ปุคฺคลา;
สจฺจํ ภูมิ นิกฺขมนฺโต,
อาทิยนฺโต สมาทิยํ.
กโรนฺโต เทนฺโต คณฺหนฺโต,
ปริโภเคน รตฺติ จ;
อรุณาฉินฺทํ ฉาเทนฺโต,
ธาเรนฺโต จ อุโปสถา.
ปวารณา กมฺมาปรา,
วตฺถุ อปรา โทสา จ;
อปรา ทฺเว จ สมฺปตฺติ,
นานา สมานเมว จ.
ปาราชิสํฆถุลฺลจฺจย,
ปาจิตฺติ ปาฏิเทสนา;
ทุกฺกฏา ทุพฺภาสิตา เจว,
สตฺต อาปตฺติกฺขนฺธา จ.
ภิชฺชติ อุปสมฺปทา,
ตเถว อปเร ทุเว;
น วตฺถพฺพํ น ทาตพฺพํ,
อภพฺพาภพฺพเมว จ.
สญฺจิจฺจ สาติสารา จ,
ปฏิกฺโกสา นิสฺสารณา;
โอสารณา ปฏิญฺญา จ,
ปฏิคฺคหา ปฏิกฺขิปา.
อุปฆาติ โจทนา จ,_
กถินา จ ทุเว ตถา;
จีวรา ปตฺตมณฺฑลา,
อธิฏฺฐานา ตเถว ทฺเว.
วิกปฺปนา จ วินยา,
เวนยิกา จ สเลฺลขา;
อาปชฺชติ จ วุฏฺฐาติ,
ปริวาสาปเร ทุเว.
ทฺเว มานตฺตา อปเร จ,
รตฺติจฺเฉโท อนาทริ;
ทฺเว โลณา ตโย อปเร,
ปริโภคกฺโกเสน จ.
เปสุญฺโญ จ คณาวสฺส,
ฐปนา ภารกปฺปิยํ;
อนาปตฺติ อธมฺมธมฺมา,
วินเย อาสเว ตถาติ.