7.8 อฏฺฐกวาร
อฏฺฐานิสํเส สมฺปสฺสมาเนน น โส ภิกฺขุ อาปตฺติยา อทสฺสเน อุกฺขิปิตพฺโพ. อฏฺฐานิสํเส สมฺปสฺสมาเนน ปเรสมฺปิ สทฺธาย สา อาปตฺติ เทเสตพฺพา. อฏฺฐ ยาวตติยกา. อฏฺฐหากาเรหิ กุลานิ ทูเสติ. อฏฺฐ มาติกา จีวรสฺส อุปฺปาทาย. อฏฺฐ มาติกา กถินสฺส อุพฺภาราย. อฏฺฐ ปานานิ. อฏฺฐหิ อสทฺธมฺเมหิ อภิภูโต ปริยาทินฺนจิตฺโต เทวทตฺโต อาปายิโก เนรยิโก กปฺปฏฺโฐ อเตกิจฺโฉ. อฏฺฐ โลกธมฺมา. อฏฺฐ ครุธมฺมา. อฏฺฐ ปาฏิเทสนียา. อฏฺฐงฺคิโก มุสาวาโท. อฏฺฐ อุโปสถงฺคานิ. อฏฺฐ ทูเตยฺยงฺคานิ. อฏฺฐ ติตฺถิยวตฺตานิ. อฏฺฐ อจฺฉริยา อพฺภุตธมฺมา มหาสมุทฺเท. อฏฺฐ อจฺฉริยา อพฺภุตธมฺมา อิมสฺมิํ ธมฺมวินเย. อฏฺฐ อนติริตฺตา. อฏฺฐ อติริตฺตา. อฏฺฐเม อรุณุคฺคมเน นิสฺสคฺคิยํ โหติ. อฏฺฐ ปาราชิกา. อฏฺฐมํ วตฺถุํ ปริปูเรนฺตี นาเสตพฺพา. อฏฺฐมํ วตฺถุํ ปริปูเรนฺติยา เทสิตาปิ อเทสิตา โหติ. อฏฺฐวาจิกา อุปสมฺปทา. อฏฺฐนฺนํ ปจฺจุฏฺฐาตพฺพํ. อฏฺฐนฺนํ อาสนํ ทาตพฺพํ. อุปาสิกา อฏฺฐ วรานิ ยาจติ. อฏฺฐหงฺเคหิ สมนฺนาคโต ภิกฺขุ ภิกฺขุโนวาทโก สมฺมนฺนิตพฺโพ. อฏฺฐานิสํสา วินยธเร. อฏฺฐ ปรมานิ. ตสฺสปาปิยสิกากมฺมกเตน ภิกฺขุนา อฏฺฐสุ ธมฺเมสุ สมฺมา วตฺติตพฺพํ. อฏฺฐ อธมฺมิกานิ ปาติโมกฺขฏฺฐปนานิ อฏฺฐ ธมฺมิกานิ ปาติโมกฺขฏฺฐปนานีติ.
อฏฺฐกํ นิฏฺฐิตํ.
ตสฺสุทฺทานํ
น โส ภิกฺขุ ปเรสมฺปิ,
ยาวตติยทูสนา;
มาติกา กถินุพฺภารา,
ปานา อภิภูเตน จ.
โลกธมฺมา ครุธมฺมา,
ปาฏิเทสนียา มุสา;
อุโปสถา จ ทูตงฺคา,_
ติตฺถิยา สมุทฺเทปิ จ.
อพฺภุตา อนติริตฺตํ,
อติริตฺตํ นิสฺสคฺคิยํ;
ปาราชิกฏฺฐมํ วตฺถุ,
อเทสิตูปสมฺปทา.
ปจฺจุฏฺฐานาสนญฺเจว,
วรํ โอวาทเกน จ;
อานิสํสา ปรมานิ,
อฏฺฐธมฺเมสุ วตฺตนา;
อธมฺมิกา ธมฺมิกา จ,
อฏฺฐกา สุปฺปกาสิตาติ.