7.9 นวกวาร
นว อาฆาตวตฺถูนิ. นว อาฆาตปฏิวินยา. นว วินีตวตฺถูนิ. นว ปฐมาปตฺติกา. นวหิ สํโฆ ภิชฺชติ. นว ปณีตโภชนานิ. นวมํเสหิ ทุกฺกฏํ. นว ปาติโมกฺขุทฺเทสา. นว ปรมานิ. นว ตณฺหามูลกา ธมฺมา. นว วิธมานา. นว จีวรานิ อธิฏฺฐาตพฺพานิ. นว จีวรานิ น วิกปฺเปตพฺพานิ. ทีฆโส นว วิทตฺถิโย สุคตวิทตฺถิยา. นว อธมฺมิกานิ ทานานิ. นว อธมฺมิกา ปฏิคฺคหา. นว อธมฺมิกา ปริโภคา— ตีณิ ธมฺมิกานิ ทานานิ, ตโย ธมฺมิกา ปฏิคฺคหา, ตโย ธมฺมิกา ปริโภคา. นว อธมฺมิกา สญฺญตฺติโย. นว ธมฺมิกา สญฺญตฺติโย. อธมฺมกมฺเม ทฺเว นวกานิ. ธมฺมกมฺเม ทฺเว นวกานิ. นว อธมฺมิกานิ ปาติโมกฺขฏฺฐปนานิ. นว ธมฺมิกานิ ปาติโมกฺขฏฺฐปนานีติ.
นวกํ นิฏฺฐิตํ.
ตสฺสุทฺทานํ
อาฆาตวตฺถุวินยา,
วินีตา ปฐเมน จ;
ภิชฺชติ จ ปณีตญฺจ,
มํสุทฺเทสปรมานิ จ.
ตณฺหา มานา อธิฏฺฐานา,
วิกปฺเป จ วิทตฺถิโย;
ทานา ปฏิคฺคหา โภคา,
ติวิธา ปุน ธมฺมิกา.
อธมฺมธมฺมสญฺญตฺติ,
ทุเว ทฺเว นวกานิ จ;
ปาติโมกฺขฏฺฐปนานิ,
อธมฺมธมฺมิกานิ จาติ.