1.10 ทุติยมารกถา
35.
147
อถ โข ภควา วสฺสํวุฏฺโฐ ภิกฺขู อามนฺเตสิ— “มยฺหํ โข, ภิกฺขเว, โยนิโส มนสิการา โยนิโส สมฺมปฺปธานา อนุตฺตรา วิมุตฺติ อนุปฺปตฺตา, อนุตฺตรา วิมุตฺติ สจฺฉิกตา. ตุมฺเหปิ, ภิกฺขเว, โยนิโส มนสิการา โยนิโส สมฺมปฺปธานา อนุตฺตรํ วิมุตฺติํ อนุปาปุณาถ, อนุตฺตรํ วิมุตฺติํ สจฺฉิกโรถา”ติ. อถ โข มาโร ปาปิมา เยน ภควา เตนุปสงฺกมิ, อุปสงฺกมิตฺวา ภควนฺตํ คาถาย อชฺฌภาสิ—
148
“พทฺโธสิ มารปาเสหิ,
เย ทิพฺพา เย จ มานุสา;
มหาพนฺธนพทฺโธสิ,
น เม สมณ โมกฺขสี”ติ.
149
“มุตฺตาหํ มารปาเสหิ,
เย ทิพฺพา เย จ มานุสา;
มหาพนฺธนมุตฺโตมฺหิ,
นิหโต ตฺวมสิ อนฺตกา”ติ.
150
อถ โข มาโร ปาปิมา— “ชานาติ มํ ภควา, ชานาติ มํ สุคโต”ติ ทุกฺขี ทุมฺมโน ตตฺเถวนฺตรธายิ.
151
ทุติยมารกถา นิฏฺฐิตา.