2.38 วชฺชนียปุคฺคลสนฺทสฺสน
น, ภิกฺขเว, ภิกฺขุนิยา นิสินฺนปริสาย ปาติโมกฺขํ อุทฺทิสิตพฺพํ. โย อุทฺทิเสยฺย, อาปตฺติ ทุกฺกฏสฺส. น สิกฺขมานาย …เป… น สามเณรสฺส …เป… น สามเณริยา …เป… น สิกฺขาปจฺจกฺขาตกสฺส …เป… น อนฺติมวตฺถุํ อชฺฌาปนฺนกสฺส นิสินฺนปริสาย ปาติโมกฺขํ อุทฺทิสิตพฺพํ. โย อุทฺทิเสยฺย, อาปตฺติ ทุกฺกฏสฺส.
น อาปตฺติยา อทสฺสเน อุกฺขิตฺตกสฺส นิสินฺนปริสาย ปาติโมกฺขํ อุทฺทิสิตพฺพํ. โย อุทฺทิเสยฺย, ยถาธมฺโม กาเรตพฺโพ. น อาปตฺติยา อปฺปฏิกมฺเม อุกฺขิตฺตกสฺส นิสินฺนปริสาย …เป… น ปาปิกาย ทิฏฺฐิยา อปฺปฏินิสฺสคฺเค อุกฺขิตฺตกสฺส นิสินฺนปริสาย ปาติโมกฺขํ อุทฺทิสิตพฺพํ. โย อุทฺทิเสยฺย, ยถาธมฺโม กาเรตพฺโพ.
น ปณฺฑกสฺส นิสินฺนปริสาย ปาติโมกฺขํ อุทฺทิสิตพฺพํ. โย อุทฺทิเสยฺย, อาปตฺติ ทุกฺกฏสฺส. น เถยฺยสํวาสกสฺส …เป… น ติตฺถิยปกฺกนฺตกสฺส …เป… น ติรจฺฉานคตสฺส …เป… น มาตุฆาตกสฺส …เป… น ปิตุฆาตกสฺส …เป… น อรหนฺตฆาตกสฺส …เป… น ภิกฺขุนิทูสกสฺส …เป… น สํฆเภทกสฺส …เป… น โลหิตุปฺปาทกสฺส …เป… น อุภโตพฺยญฺชนกสฺส นิสินฺนปริสาย ปาติโมกฺขํ อุทฺทิสิตพฺพํ. โย อุทฺทิเสยฺย, อาปตฺติ ทุกฺกฏสฺส.
น, ภิกฺขเว, ปาริวาสิกปาริสุทฺธิทาเนน อุโปสโถ กาตพฺโพ, อญฺญตฺร อวุฏฺฐิตาย ปริสาย. น จ, ภิกฺขเว, อนุโปสเถ อุโปสโถ กาตพฺโพ, อญฺญตฺร สํฆสามคฺคิยา”ติ.
ตติยภาณวาโร นิฏฺฐิโต.
อุโปสถกฺขนฺธโก ทุติโย.
ตสฺสุทฺทานํ
ติตฺถิยา พิมฺพิสาโร จ,
สนฺนิปติตุํ ตุณฺหิกา;
ธมฺมํ รโห ปาติโมกฺขํ,
เทวสิกํ ตทา สกิํ.
ยถาปริสา สมคฺคํ,
สามคฺคี มทฺทกุจฺฉิ จ;
สีมา มหตี นทิยา,
อนุ ทฺเว ขุทฺทกานิ จ.
นวา ราชคเห เจว,
สีมา อวิปฺปวาสนา;
สมฺมนฺเน ปฐมํ สีมํ,
ปจฺฉา สีมํ สมูหเน.
อสมฺมตา คามสีมา,
นทิยา สมุทฺเท สเร;
อุทกุกฺเขโป ภินฺทนฺติ,_
ตเถวชฺโฌตฺถรนฺติ จ.
กติ กมฺมานิ อุทฺเทโส,
สวรา อสตีปิ จ;
ธมฺมํ วินยํ ตชฺเชนฺติ,
ปุน วินยตชฺชนา.
โจทนา กเต โอกาเส,
อธมฺมปฺปฏิกฺโกสนา;
จตุปญฺจปรา อาวิ,
สญฺจิจฺจ เจปิ วายเม.
สคหฏฺฐา อนชฺฌิฏฺฐา,
โจทนมฺหิ น ชานติ;
สมฺพหุลา น ชานนฺติ,
สชฺชุกํ น จ คจฺฉเร.
กติมี กีวติกา ทูเร,
อาโรเจตุญฺจ นสฺสริ;
อุกฺลาปํ อาสนํ ทีโป,_
ทิสา อญฺโญ พหุสฺสุโต.
สชฺชุกํ วสฺสุโปสโถ,
สุทฺธิกมฺมญฺจ ญาตกา;
คคฺโค จตุตโย ทฺเวโก,
อาปตฺติสภาคา สริ.
สพฺโพ สํโฆ เวมติโก,
น ชานนฺติ พหุสฺสุโต;
พหู สมสมา โถกา,
ปริสา อวุฏฺฐิตาย จ.
เอกจฺจา วุฏฺฐิตา สพฺพา,
ชานนฺติ จ เวมติกา;
กปฺปเตวาติ กุกฺกุจฺจา,
ชานํ ปสฺสํ สุณนฺติ จ.
อาวาสิเกน อาคนฺตุ,
จาตุปนฺนรโส ปุน;
ปาฏิปโท ปนฺนรโส,
ลิงฺคสํวาสกา อุโภ.
ปาริวาสานุโปสโถ,
อญฺญตฺร สํฆสามคฺคิยา;
เอเต วิภตฺตา อุทฺทานา,
วตฺถุวิภูตการณาติ.
อิมสฺมิํ ขนฺธเก วตฺถูนิ ฉอสีติ.
อุโปสถกฺขนฺธโก นิฏฺฐิโต.