3.11 อธมฺมิกกติกา
เตน โข ปน สมเยน สาวตฺถิยา สํเฆน เอวรูปา กติกา กตา โหติ— “อนฺตราวสฺสํ น ปพฺพาเชตพฺพนฺ”ติ. วิสาขาย มิคารมาตุยา นตฺตา ภิกฺขู อุปสงฺกมิตฺวา ปพฺพชฺชํ ยาจิ. ภิกฺขู เอวมาหํสุ— “สํเฆน โข, อาวุโส, เอวรูปา กติกา กตา ‘อนฺตราวสฺสํ น ปพฺพาเชตพฺพนฺ’ติ. อาคเมหิ, อาวุโส, ยาว ภิกฺขู วสฺสํ วสนฺติ. วสฺสํวุฏฺฐา ปพฺพาเชสฺสนฺตี”ติ. อถ โข เต ภิกฺขู วสฺสํวุฏฺฐา วิสาขาย มิคารมาตุยา นตฺตารํ เอตทโวจุํ— “เอหิ ทานิ, อาวุโส, ปพฺพชาหี”ติ. โส เอวมาห— “สจาหํ, ภนฺเต, ปพฺพชิโต อสฺสํ, อภิรเมยฺยามหํ. น ทานาหํ, ภนฺเต, ปพฺพชิสฺสามี”ติ. วิสาขา มิคารมาตา อุชฺฌายติ ขิยฺยติ วิปาเจติ— “กถญฺหิ นาม อยฺยา เอวรูปํ กติกํ กริสฺสนฺติ— ‘น อนฺตราวสฺสํ ปพฺพาเชตพฺพนฺ’ติ. กํ กาลํ ธมฺโม น จริตพฺโพ”ติ?
อโสฺสสุํ โข ภิกฺขู วิสาขาย มิคารมาตุยา อุชฺฌายนฺติยา ขิยฺยนฺติยา วิปาเจนฺติยา. อถ โข เต ภิกฺขู ภควโต เอตมตฺถํ อาโรเจสุํ. “น, ภิกฺขเว, เอวรูปา กติกา กาตพฺพา— ‘น อนฺตราวสฺสํ ปพฺพาเชตพฺพนฺ’ติ. โย กเรยฺย, อาปตฺติ ทุกฺกฏสฺสา”ติ.