3.6 ปหิเตเยวอนุชานน
อิธ ปน, ภิกฺขเว, ภิกฺขุสฺส ภาตา คิลาโน โหติ. โส เจ ภาตุโน สนฺติเก ทูตํ ปหิเณยฺย— ‘อหญฺหิ คิลาโน, อาคจฺฉตุ เม ภาตา, อิจฺฉามิ ภาตุโน อาคตนฺ’ติ, คนฺตพฺพํ, ภิกฺขเว, สตฺตาหกรณีเยน, ปหิเต, น เตฺวว อปฺปหิเต. สตฺตาหํ สนฺนิวตฺโต กาตพฺโพ.
อิธ ปน, ภิกฺขเว, ภิกฺขุสฺส ภคินี คิลานา โหติ. สา เจ ภาตุโน สนฺติเก ทูตํ ปหิเณยฺย— ‘อหญฺหิ คิลานา, อาคจฺฉตุ เม ภาตา, อิจฺฉามิ ภาตุโน อาคตนฺ’ติ, คนฺตพฺพํ, ภิกฺขเว, สตฺตาหกรณีเยน, ปหิเต, น เตฺวว อปฺปหิเต. สตฺตาหํ สนฺนิวตฺโต กาตพฺโพ.
อิธ ปน, ภิกฺขเว, ภิกฺขุสฺส ญาตโก คิลาโน โหติ. โส เจ ภิกฺขุสฺส สนฺติเก ทูตํ ปหิเณยฺย— ‘อหญฺหิ คิลาโน, อาคจฺฉตุ ภทนฺโต, อิจฺฉามิ ภทนฺตสฺส อาคตนฺ’ติ, คนฺตพฺพํ, ภิกฺขเว, สตฺตาหกรณีเยน, ปหิเต, น เตฺวว อปฺปหิเต. สตฺตาหํ สนฺนิวตฺโต กาตพฺโพ.
อิธ ปน, ภิกฺขเว, ภิกฺขุคติโก คิลาโน โหติ. โส เจ ภิกฺขูนํ สนฺติเก ทูตํ ปหิเณยฺย— ‘อหญฺหิ คิลาโน, อาคจฺฉนฺตุ ภทนฺตา, อิจฺฉามิ ภทนฺตานํ อาคตนฺ’ติ, คนฺตพฺพํ, ภิกฺขเว, สตฺตาหกรณีเยน, ปหิเต, น เตฺวว อปฺปหิเต. สตฺตาหํ สนฺนิวตฺโต กาตพฺโพ”ติ.
เตน โข ปน สมเยน สํฆสฺส วิหาโร อุนฺทฺริยติ. อญฺญตเรน อุปาสเกน อรญฺเญ ภณฺฑํ เฉทาปิตํ โหติ. โส ภิกฺขูนํ สนฺติเก ทูตํ ปาเหสิ— “สเจ ภทนฺตา ตํ ภณฺฑํ อาวหาเปยฺยุํ, ทชฺชาหํ ตํ ภณฺฑนฺ”ติ. ภควโต เอตมตฺถํ อาโรเจสุํ. “อนุชานามิ, ภิกฺขเว, สํฆกรณีเยน คนฺตุํ. สตฺตาหํ สนฺนิวตฺโต กาตพฺโพ”ติ.
วสฺสาวาสภาณวาโร นิฏฺฐิโต.