3.8 สํฆเภเทอนาปตฺติวสฺสจฺเฉทวาร
อิธ ปน, ภิกฺขเว, วสฺสูปคโต ภิกฺขุ ปสฺสติ สมฺพหุเล ภิกฺขู สํฆเภทาย ปรกฺกมนฺเต. ตตฺร เจ ภิกฺขุโน เอวํ โหติ— ‘ครุโก โข สํฆเภโท วุตฺโต ภควตา; มา มยิ สมฺมุขีภูเต สํโฆ ภิชฺชี’ติ, ปกฺกมิตพฺพํ. อนาปตฺติ วสฺสจฺเฉทสฺส.
อิธ ปน, ภิกฺขเว, วสฺสูปคโต ภิกฺขุ สุณาติ— ‘อสุกสฺมิํ กิร อาวาเส สมฺพหุลา ภิกฺขู สํฆเภทาย ปรกฺกมนฺตี’ติ. ตตฺร เจ ภิกฺขุโน เอวํ โหติ— ‘ครุโก โข สํฆเภโท วุตฺโต ภควตา; มา มยิ สมฺมุขีภูเต สํโฆ ภิชฺชี’ติ, ปกฺกมิตพฺพํ. อนาปตฺติ วสฺสจฺเฉทสฺส.
อิธ ปน, ภิกฺขเว, วสฺสูปคโต ภิกฺขุ สุณาติ— ‘อสุกสฺมิํ กิร อาวาเส สมฺพหุลา ภิกฺขู สํฆเภทาย ปรกฺกมนฺตี’ติ. ตตฺร เจ ภิกฺขุโน เอวํ โหติ— ‘เต โข เม ภิกฺขู มิตฺตา. ตฺยาหํ วกฺขามิ “ครุโก โข, อาวุโส, สํฆเภโท วุตฺโต ภควตา; มายสฺมนฺตานํ สํฆเภโท รุจฺจิตฺถา”ติ. กริสฺสนฺติ เม วจนํ, สุสฺสูสิสฺสนฺติ, โสตํ โอทหิสฺสนฺตี’ติ, ปกฺกมิตพฺพํ. อนาปตฺติ วสฺสจฺเฉทสฺส.
อิธ ปน, ภิกฺขเว, วสฺสูปคโต ภิกฺขุ สุณาติ— ‘อสุกสฺมิํ กิร อาวาเส สมฺพหุลา ภิกฺขู สํฆเภทาย ปรกฺกมนฺตี’ติ. ตตฺร เจ ภิกฺขุโน เอวํ โหติ— ‘เต โข เม ภิกฺขู น มิตฺตา; อปิ จ เย เตสํ มิตฺตา, เต เม มิตฺตา. ตฺยาหํ วกฺขามิ. เต วุตฺตา เต วกฺขนฺติ “ครุโก โข, อาวุโส, สํฆเภโท วุตฺโต ภควตา; มายสฺมนฺตานํ สํฆเภโท รุจฺจิตฺถา”ติ. กริสฺสนฺติ เตสํ วจนํ, สุสฺสูสิสฺสนฺติ, โสตํ โอทหิสฺสนฺตี’ติ, ปกฺกมิตพฺพํ. อนาปตฺติ วสฺสจฺเฉทสฺส.
อิธ ปน, ภิกฺขเว, วสฺสูปคโต ภิกฺขุ สุณาติ— ‘อสุกสฺมิํ กิร อาวาเส สมฺพหุเลหิ ภิกฺขูหิ สํโฆ ภินฺโน’ติ. ตตฺร เจ ภิกฺขุโน เอวํ โหติ— ‘เต โข เม ภิกฺขู มิตฺตา. ตฺยาหํ วกฺขามิ “ครุโก โข, อาวุโส, สํฆเภโท วุตฺโต ภควตา; มายสฺมนฺตานํ สํฆเภโท รุจฺจิตฺถา”ติ. กริสฺสนฺติ เม วจนํ, สุสฺสูสิสฺสนฺติ, โสตํ โอทหิสฺสนฺตี’ติ, ปกฺกมิตพฺพํ. อนาปตฺติ วสฺสจฺเฉทสฺส.
อิธ ปน, ภิกฺขเว, วสฺสูปคโต ภิกฺขุ สุณาติ— ‘อสุกสฺมิํ กิร อาวาเส สมฺพหุเลหิ ภิกฺขูหิ สํโฆ ภินฺโน’ติ. ตตฺร เจ ภิกฺขุโน เอวํ โหติ— ‘เต โข เม ภิกฺขู น มิตฺตา; อปิ จ เย เตสํ มิตฺตา เต เม มิตฺตา. ตฺยาหํ วกฺขามิ. เต วุตฺตา เต วกฺขนฺติ “ครุโก โข, อาวุโส, สํฆเภโท วุตฺโต ภควตา; มายสฺมนฺตานํ สํฆเภโท รุจฺจิตฺถา”ติ. กริสฺสนฺติ เตสํ วจนํ, สุสฺสูสิสฺสนฺติ, โสตํ โอทหิสฺสนฺตี’ติ, ปกฺกมิตพฺพํ. อนาปตฺติ วสฺสจฺเฉทสฺส.
อิธ ปน, ภิกฺขเว, วสฺสูปคโต ภิกฺขุ สุณาติ— ‘อมุกสฺมิํ กิร อาวาเส สมฺพหุลา ภิกฺขุนิโย สํฆเภทาย ปรกฺกมนฺตี’ติ. ตตฺร เจ ภิกฺขุโน เอวํ โหติ— ‘ตา โข เม ภิกฺขุนิโย มิตฺตา. ตาหํ วกฺขามิ “ครุโก โข, ภคินิโย, สํฆเภโท วุตฺโต ภควตา; มา ภคินีนํ สํฆเภโท รุจฺจิตฺถา”ติ. กริสฺสนฺติ เม วจนํ, สุสฺสูสิสฺสนฺติ, โสตํ โอทหิสฺสนฺตี’ติ, ปกฺกมิตพฺพํ. อนาปตฺติ วสฺสจฺเฉทสฺส.
อิธ ปน, ภิกฺขเว, วสฺสูปคโต ภิกฺขุ สุณาติ— ‘อมุกสฺมิํ กิร อาวาเส สมฺพหุลา ภิกฺขุนิโย สํฆเภทาย ปรกฺกมนฺตี’ติ. ตตฺร เจ ภิกฺขุโน เอวํ โหติ— ‘ตา โข เม ภิกฺขุนิโย น มิตฺตา. อปิ จ ยา ตาสํ มิตฺตา, ตา เม มิตฺตา. ตาหํ วกฺขามิ. ตา วุตฺตา ตา วกฺขนฺติ “ครุโก โข, ภคินิโย, สํฆเภโท วุตฺโต ภควตา. มา ภคินีนํ สํฆเภโท รุจฺจิตฺถา”ติ. กริสฺสนฺติ ตาสํ วจนํ, สุสฺสูสิสฺสนฺติ, โสตํ โอทหิสฺสนฺตี’ติ, ปกฺกมิตพฺพํ. อนาปตฺติ วสฺสจฺเฉทสฺส.
อิธ ปน, ภิกฺขเว, วสฺสูปคโต ภิกฺขุ สุณาติ— ‘อมุกสฺมิํ กิร อาวาเส สมฺพหุลาหิ ภิกฺขุนีหิ สํโฆ ภินฺโน’ติ. ตตฺร เจ ภิกฺขุโน เอวํ โหติ— ‘ตา โข เม ภิกฺขุนิโย มิตฺตา. ตาหํ วกฺขามิ “ครุโก โข, ภคินิโย, สํฆเภโท วุตฺโต ภควตา. มา ภคินีนํ สํฆเภโท รุจฺจิตฺถา”ติ. กริสฺสนฺติ เม วจนํ, สุสฺสูสิสฺสนฺติ, โสตํ โอทหิสฺสนฺตี’ติ, ปกฺกมิตพฺพํ. อนาปตฺติ วสฺสจฺเฉทสฺส.
อิธ ปน, ภิกฺขเว, วสฺสูปคโต ภิกฺขุ สุณาติ— ‘อมุกสฺมิํ กิร อาวาเส สมฺพหุลาหิ ภิกฺขุนีหิ สํโฆ ภินฺโน’ติ. ตตฺร เจ ภิกฺขุโน เอวํ โหติ— ‘ตา โข เม ภิกฺขุนิโย น มิตฺตา. อปิ จ ยา ตาสํ มิตฺตา ตา เม มิตฺตา. ตาหํ วกฺขามิ. ตา วุตฺตา ตา วกฺขนฺติ “ครุโก โข, ภคินิโย, สํฆเภโท วุตฺโต ภควตา; มา ภคินีนํ สํฆเภโท รุจฺจิตฺถา”ติ. กริสฺสนฺติ ตาสํ วจนํ, สุสฺสูสิสฺสนฺติ, โสตํ โอทหิสฺสนฺตี’ติ, ปกฺกมิตพฺพํ. อนาปตฺติ วสฺสจฺเฉทสฺสา”ติ.