4.23 ถุลฺลจฺจยวตฺถุกาทิ
อิธ ปน, ภิกฺขเว, ภิกฺขุ ตทหุ ปวารณาย ถุลฺลจฺจยํ อชฺฌาปนฺโน โหติ. เอกจฺเจ ภิกฺขู ถุลฺลจฺจยทิฏฺฐิโน โหนฺติ, เอกจฺเจ ภิกฺขู สํฆาทิเสสทิฏฺฐิโน โหนฺติ. เย เต, ภิกฺขเว, ภิกฺขู ถุลฺลจฺจยทิฏฺฐิโน, เตหิ โส, ภิกฺขเว, ภิกฺขุ เอกมนฺตํ อปเนตฺวา ยถาธมฺมํ การาเปตฺวา สํฆํ อุปสงฺกมิตฺวา เอวมสฺส วจนีโย— ‘ยํ โข โส, อาวุโส, ภิกฺขุ อาปตฺติํ อาปนฺโน, สาสฺส ยถาธมฺมํ ปฏิกตา. ยทิ สํฆสฺส ปตฺตกลฺลํ, สํโฆ ปวาเรยฺยา’ติ.
อิธ ปน, ภิกฺขเว, ภิกฺขุ ตทหุ ปวารณาย ถุลฺลจฺจยํ อชฺฌาปนฺโน โหติ. เอกจฺเจ ภิกฺขู ถุลฺลจฺจยทิฏฺฐิโน โหนฺติ, เอกจฺเจ ภิกฺขู ปาจิตฺติยทิฏฺฐิโน โหนฺติ …เป… เอกจฺเจ ภิกฺขู ถุลฺลจฺจยทิฏฺฐิโน โหนฺติ, เอกจฺเจ ภิกฺขู ปาฏิเทสนียทิฏฺฐิโน โหนฺติ… เอกจฺเจ ภิกฺขู ถุลฺลจฺจยทิฏฺฐิโน โหนฺติ, เอกจฺเจ ภิกฺขู ทุกฺกฏทิฏฺฐิโน โหนฺติ… เอกจฺเจ ภิกฺขู ถุลฺลจฺจยทิฏฺฐิโน โหนฺติ, เอกจฺเจ ภิกฺขู ทุพฺภาสิตทิฏฺฐิโน โหนฺติ. เย เต, ภิกฺขเว, ภิกฺขู ถุลฺลจฺจยทิฏฺฐิโน, เตหิ โส, ภิกฺขเว, ภิกฺขุ เอกมนฺตํ อปเนตฺวา ยถาธมฺมํ การาเปตฺวา สํฆํ อุปสงฺกมิตฺวา เอวมสฺส วจนีโย— ‘ยํ โข โส, อาวุโส, ภิกฺขุ อาปตฺติํ อาปนฺโน, สาสฺส ยถาธมฺมํ ปฏิกตา. ยทิ สํฆสฺส ปตฺตกลฺลํ, สํโฆ ปวาเรยฺยา’ติ.
อิธ ปน, ภิกฺขเว, ภิกฺขุ ตทหุ ปวารณาย ปาจิตฺติยํ อชฺฌาปนฺโน โหติ …เป… ปาฏิเทสนียํ อชฺฌาปนฺโน โหติ… ทุกฺกฏํ อชฺฌาปนฺโน โหติ… ทุพฺภาสิตํ อชฺฌาปนฺโน โหติ. เอกจฺเจ ภิกฺขู ทุพฺภาสิตทิฏฺฐิโน โหนฺติ, เอกจฺเจ ภิกฺขู สํฆาทิเสสทิฏฺฐิโน โหนฺติ. เย เต, ภิกฺขเว, ภิกฺขู ทุพฺภาสิตทิฏฺฐิโน, เตหิ โส, ภิกฺขเว, ภิกฺขุ เอกมนฺตํ อปเนตฺวา ยถาธมฺมํ การาเปตฺวา สํฆํ อุปสงฺกมิตฺวา เอวมสฺส วจนีโย— ‘ยํ โข โส, อาวุโส, ภิกฺขุ อาปตฺติํ อาปนฺโน, สาสฺส ยถาธมฺมํ ปฏิกตา. ยทิ สํฆสฺส ปตฺตกลฺลํ, สํโฆ ปวาเรยฺยา’ติ.
อิธ ปน, ภิกฺขเว, ภิกฺขุ ตทหุ ปวารณาย ทุพฺภาสิตํ อชฺฌาปนฺโน โหติ. เอกจฺเจ ภิกฺขู ทุพฺภาสิตทิฏฺฐิโน โหนฺติ, เอกจฺเจ ภิกฺขู ถุลฺลจฺจยทิฏฺฐิโน โหนฺติ …เป… เอกจฺเจ ภิกฺขู ทุพฺภาสิตทิฏฺฐิโน โหนฺติ, เอกจฺเจ ภิกฺขู ปาจิตฺติยทิฏฺฐิโน โหนฺติ… เอกจฺเจ ภิกฺขู ทุพฺภาสิตทิฏฺฐิโน โหนฺติ, เอกจฺเจ ภิกฺขู ปาฏิเทสนียทิฏฺฐิโน โหนฺติ… เอกจฺเจ ภิกฺขู ทุพฺภาสิตทิฏฺฐิโน โหนฺติ, เอกจฺเจ ภิกฺขู ทุกฺกฏทิฏฺฐิโน โหนฺติ. เย เต, ภิกฺขเว, ภิกฺขู ทุพฺภาสิตทิฏฺฐิโน, เตหิ โส, ภิกฺขเว, ภิกฺขุ เอกมนฺตํ อปเนตฺวา ยถาธมฺมํ การาเปตฺวา สํฆํ อุปสงฺกมิตฺวา เอวมสฺส วจนีโย— ‘ยํ โข โส, อาวุโส, ภิกฺขุ อาปตฺติํ อาปนฺโน, สาสฺส ยถาธมฺมํ ปฏิกตา. ยทิ สํฆสฺส ปตฺตกลฺลํ, สํโฆ ปวาเรยฺยา’ติ.