4.24 วตฺถุฐปนาทิ
อิธ ปน, ภิกฺขเว, ภิกฺขุ ตทหุ ปวารณาย สํฆมชฺเฌ อุทาหเรยฺย— ‘สุณาตุ เม, ภนฺเต, สํโฆ. อิทํ วตฺถุ ปญฺญายติ, น ปุคฺคโล. ยทิ สํฆสฺส ปตฺตกลฺลํ, วตฺถุํ ฐเปตฺวา สํโฆ ปวาเรยฺยา’ติ. โส เอวมสฺส วจนีโย— ‘ภควตา โข, อาวุโส, วิสุทฺธานํ ปวารณา ปญฺญตฺตา. สเจ วตฺถุ ปญฺญายติ, น ปุคฺคโล, อิทาเนว นํ วเทหี’ติ.
อิธ ปน, ภิกฺขเว, ภิกฺขุ ตทหุ ปวารณาย สํฆมชฺเฌ อุทาหเรยฺย— ‘สุณาตุ เม, ภนฺเต, สํโฆ. อยํ ปุคฺคโล ปญฺญายติ, น วตฺถุ. ยทิ สํฆสฺส ปตฺตกลฺลํ, ปุคฺคลํ ฐเปตฺวา สํโฆ ปวาเรยฺยา’ติ. โส เอวมสฺส วจนีโย— ‘ภควตา โข, อาวุโส, สมคฺคานํ ปวารณา ปญฺญตฺตา. สเจ ปุคฺคโล ปญฺญายติ, น วตฺถุ, อิทาเนว นํ วเทหี’ติ.
อิธ ปน, ภิกฺขเว, ภิกฺขุ ตทหุ ปวารณาย สํฆมชฺเฌ อุทาหเรยฺย— ‘สุณาตุ เม, ภนฺเต, สํโฆ. อิทํ วตฺถุ จ ปุคฺคโล จ ปญฺญายติ. ยทิ สํฆสฺส ปตฺตกลฺลํ, วตฺถุญฺจ ปุคฺคลญฺจ ฐเปตฺวา สํโฆ ปวาเรยฺยา’ติ. โส เอวมสฺส วจนีโย— ‘ภควตา โข, อาวุโส, วิสุทฺธานญฺจ สมคฺคานญฺจ ปวารณา ปญฺญตฺตา. สเจ วตฺถุ จ ปุคฺคโล จ ปญฺญายติ, อิทาเนว นํ วเทหี’ติ.
ปุพฺเพ เจ, ภิกฺขเว, ปวารณาย วตฺถุ ปญฺญายติ, ปจฺฉา ปุคฺคโล, กลฺลํ วจนาย. ปุพฺเพ เจ, ภิกฺขเว, ปวารณาย ปุคฺคโล ปญฺญายติ, ปจฺฉา วตฺถุ, กลฺลํ วจนาย. ปุพฺเพ เจ, ภิกฺขเว, ปวารณาย วตฺถุ จ ปุคฺคโล จ ปญฺญายติ, ตญฺเจ กตาย ปวารณาย อุกฺโกเฏติ, อุกฺโกฏนกํ ปาจิตฺติยนฺ”ติ.