7.12 อปวิลายนนวก
ภิกฺขุ อตฺถตกถิโน ทิสงฺคมิโก ปกฺกมติ จีวรปฏิวีสํ อปวิลายมาโน. ตเมนํ ทิสํคตํ ภิกฺขู ปุจฺฉนฺติ— “กหํ ตฺวํ, อาวุโส, วสฺสํวุฏฺโฐ, กตฺถ จ เต จีวรปฏิวีโส”ติ? โส เอวํ วเทติ— “อมุกสฺมิํ อาวาเส วสฺสํวุฏฺโฐมฺหิ. ตตฺถ จ เม จีวรปฏิวีโส”ติ. เต เอวํ วทนฺติ— “คจฺฉาวุโส, ตํ จีวรํ อาหร, มยํ เต อิธ จีวรํ กริสฺสามา”ติ. โส ตํ อาวาสํ คนฺตฺวา ภิกฺขู ปุจฺฉติ— “กหํ เม, อาวุโส, จีวรปฏิวีโส”ติ? เต เอวํ วทนฺติ— “อยํ เต, อาวุโส, จีวรปฏิวีโส; กหํ คมิสฺสสี”ติ? โส เอวํ วเทติ— “อมุกํ นาม อาวาสํ คมิสฺสามิ, ตตฺถ เม ภิกฺขู จีวรํ กริสฺสนฺตี”ติ. เต เอวํ วทนฺติ— “อลํ, อาวุโส, มา อคมาสิ. มยํ เต อิธ จีวรํ กริสฺสามา”ติ. ตสฺส เอวํ โหติ— “อิเธวิมํ จีวรํ กาเรสฺสํ, น ปจฺเจสฺสนฺ”ติ. โส ตํ จีวรํ กาเรติ. ตสฺส ภิกฺขุโน นิฏฺฐานนฺติโก กถินุทฺธาโร. (1)
ภิกฺขุ อตฺถตกถิโน ทิสงฺคมิโก ปกฺกมติ …เป… “เนวิมํ จีวรํ กาเรสฺสํ, น ปจฺเจสฺสนฺ”ติ. ตสฺส ภิกฺขุโน สนฺนิฏฺฐานนฺติโก กถินุทฺธาโร. (2)
ภิกฺขุ อตฺถตกถิโน ทิสงฺคมิโก ปกฺกมติ …เป… “อิเธวิมํ จีวรํ กาเรสฺสํ, น ปจฺเจสฺสนฺ”ติ. โส ตํ จีวรํ กาเรติ. ตสฺส ตํ จีวรํ กยิรมานํ นสฺสติ. ตสฺส ภิกฺขุโน นาสนนฺติโก กถินุทฺธาโร. (3)
ภิกฺขุ อตฺถตกถิโน ทิสงฺคมิโก ปกฺกมติ จีวรปฏิวีสํ อปวิลายมาโน. ตเมนํ ทิสํคตํ ภิกฺขู ปุจฺฉนฺติ— “กหํ ตฺวํ, อาวุโส, วสฺสํวุฏฺโฐ, กตฺถ จ เต จีวรปฏิวีโส”ติ? โส เอวํ วเทติ— “อมุกสฺมิํ อาวาเส วสฺสํวุฏฺโฐมฺหิ, ตตฺถ จ เม จีวรปฏิวีโส”ติ. เต เอวํ วทนฺติ— “คจฺฉาวุโส, ตํ จีวรํ อาหร, มยํ เต อิธ จีวรํ กริสฺสามา”ติ. โส ตํ อาวาสํ คนฺตฺวา ภิกฺขู ปุจฺฉติ— “กหํ เม, อาวุโส, จีวรปฏิวีโส”ติ? เต เอวํ วทนฺติ— “อยํ เต, อาวุโส, จีวรปฏิวีโส”ติ. โส ตํ จีวรํ อาทาย ตํ อาวาสํ คจฺฉติ. ตเมนํ อนฺตรามคฺเค ภิกฺขู ปุจฺฉนฺติ— “อาวุโส, กหํ คมิสฺสสี”ติ? โส เอวํ วเทติ— “อมุกํ นาม อาวาสํ คมิสฺสามิ, ตตฺถ เม ภิกฺขู จีวรํ กริสฺสนฺตี”ติ. เต เอวํ วทนฺติ— “อลํ, อาวุโส, มา อคมาสิ, มยํ เต อิธ จีวรํ กริสฺสามา”ติ. ตสฺส เอวํ โหติ— “อิเธวิมํ จีวรํ กาเรสฺสํ น ปจฺเจสฺสนฺ”ติ. โส ตํ จีวรํ กาเรติ. ตสฺส ภิกฺขุโน นิฏฺฐานนฺติโก กถินุทฺธาโร. (4)
ภิกฺขุ อตฺถตกถิโน ทิสงฺคมิโก ปกฺกมติ จีวรปฏิวีสํ อปวิลายมาโน. ตเมนํ ทิสํคตํ ภิกฺขู ปุจฺฉนฺติ— “กหํ ตฺวํ, อาวุโส, วสฺสํวุฏฺโฐ, กตฺถ จ เต จีวรปฏิวีโส”ติ? โส เอวํ วเทติ— “อมุกสฺมิํ อาวาเส วสฺสํวุฏฺโฐมฺหิ, ตตฺถ จ เม จีวรปฏิวีโส”ติ. เต เอวํ วทนฺติ— “คจฺฉาวุโส, ตํ จีวรํ อาหร, มยํ เต อิธ จีวรํ กริสฺสามา”ติ. โส ตํ อาวาสํ คนฺตฺวา ภิกฺขู ปุจฺฉติ— “กหํ เม, อาวุโส, จีวรปฏิวีโส”ติ? เต เอวํ วทนฺติ— “อยํ เต, อาวุโส, จีวรปฏิวีโส”ติ. โส ตํ จีวรํ อาทาย ตํ อาวาสํ คจฺฉติ. ตเมนํ อนฺตรามคฺเค ภิกฺขู ปุจฺฉนฺติ— “อาวุโส, กหํ คมิสฺสสี”ติ? โส เอวํ วเทติ— “อมุกํ นาม อาวาสํ คมิสฺสามิ, ตตฺถ เม ภิกฺขู จีวรํ กริสฺสนฺตี”ติ. เต เอวํ วทนฺติ— “อลํ, อาวุโส, มา อคมาสิ, มยํ เต อิธ จีวรํ กริสฺสามา”ติ. ตสฺส เอวํ โหติ— “เนวิมํ จีวรํ กาเรสฺสํ, น ปจฺเจสฺสนฺ”ติ. ตสฺส ภิกฺขุโน สนฺนิฏฺฐานนฺติโก กถินุทฺธาโร. (5)
ภิกฺขุ อตฺถตกถิโน ทิสงฺคมิโก ปกฺกมติ …เป… “อิเธวิมํ จีวรํ กาเรสฺสํ, น ปจฺเจสฺสนฺ”ติ. โส ตํ จีวรํ กาเรติ. ตสฺส ตํ จีวรํ กยิรมานํ นสฺสติ. ตสฺส ภิกฺขุโน นาสนนฺติโก กถินุทฺธาโร. (6)
ภิกฺขุ อตฺถตกถิโน ทิสงฺคมิโก ปกฺกมติ จีวรปฏิวีสํ อปวิลายมาโน. ตเมนํ ทิสํคตํ ภิกฺขู ปุจฺฉนฺติ— “กหํ ตฺวํ, อาวุโส, วสฺสํวุฏฺโฐ, กตฺถ จ เต จีวรปฏิวีโส”ติ? โส เอวํ วเทติ— “อมุกสฺมิํ อาวาเส วสฺสํวุฏฺโฐมฺหิ, ตตฺถ จ เม จีวรปฏิวีโส”ติ. เต เอวํ วทนฺติ— “คจฺฉาวุโส, ตํ จีวรํ อาหร, มยํ เต อิธ จีวรํ กริสฺสามา”ติ. โส ตํ อาวาสํ คนฺตฺวา ภิกฺขู ปุจฺฉติ— “กหํ เม, อาวุโส, จีวรปฏิวีโส”ติ? เต เอวํ วทนฺติ— “อยํ เต, อาวุโส, จีวรปฏิวีโส”ติ. โส ตํ จีวรํ อาทาย ตํ อาวาสํ คจฺฉติ. ตสฺส ตํ อาวาสํ คตสฺส เอวํ โหติ— “อิเธวิมํ จีวรํ กาเรสฺสํ, น ปจฺเจสฺสนฺ”ติ. โส ตํ จีวรํ กาเรติ. ตสฺส ภิกฺขุโน นิฏฺฐานนฺติโก กถินุทฺธาโร. (7)
ภิกฺขุ อตฺถตกถิโน ทิสงฺคมิโก ปกฺกมติ …เป… “เนวิมํ จีวรํ กาเรสฺสํ, น ปจฺเจสฺสนฺ”ติ. ตสฺส ภิกฺขุโน สนฺนิฏฺฐานนฺติโก กถินุทฺธาโร. (8)
ภิกฺขุ อตฺถตกถิโน ทิสงฺคมิโก ปกฺกมติ …เป… “อิเธวิมํ จีวรํ กาเรสฺสํ, น ปจฺเจสฺสนฺ”ติ. โส ตํ จีวรํ กาเรติ. ตสฺส ตํ จีวรํ กยิรมานํ นสฺสติ. ตสฺส ภิกฺขุโน นาสนนฺติโก กถินุทฺธาโร. (9)
อปวิลายนนวกํ นิฏฺฐิตํ.