8.21 สํฆิกจีวรุปฺปาทกถา
เตน โข ปน สมเยน อญฺญตโร ภิกฺขุ เอโก วสฺสํ วสิ. ตตฺถ มนุสฺสา สํฆสฺส เทมาติ จีวรานิ อทํสุ. อถ โข ตสฺส ภิกฺขุโน เอตทโหสิ— “ภควตา ปญฺญตฺตํ— ‘จตุวคฺโค ปจฺฉิโม สํโฆ’ติ. อหญฺจมฺหิ เอกโก. อิเม จ มนุสฺสา สํฆสฺส เทมาติ จีวรานิ อทํสุ. ยนฺนูนาหํ อิมานิ สํฆิกานิ จีวรานิ สาวตฺถิํ หเรยฺยนฺ”ติ. อถ โข โส ภิกฺขุ ตานิ จีวรานิ อาทาย สาวตฺถิํ คนฺตฺวา ภควโต เอตมตฺถํ อาโรเจสิ. “ตุเยฺหว, ภิกฺขุ, ตานิ จีวรานิ ยาว กถินสฺส อุพฺภารายา”ติ. “อิธ ปน, ภิกฺขเว, ภิกฺขุ เอโก วสฺสํ วสติ. ตตฺถ มนุสฺสา— ‘สํฆสฺส เทมา’ติ จีวรานิ เทนฺติ. อนุชานามิ, ภิกฺขเว, ตเสฺสว ตานิ จีวรานิ ยาว กถินสฺส อุพฺภารายา”ติ.
เตน โข ปน สมเยน อญฺญตโร ภิกฺขุ อุตุกาลํ เอโก วสิ. ตตฺถ มนุสฺสา สํฆสฺส เทมาติ จีวรานิ อทํสุ. อถ โข ตสฺส ภิกฺขุโน เอตทโหสิ— “ภควตา ปญฺญตฺตํ— ‘จตุวคฺโค ปจฺฉิโม สํโฆ’ติ. อหญฺจมฺหิ เอกโก. อิเม จ มนุสฺสา— ‘สํฆสฺส เทมา’ติ จีวรานิ อทํสุ. ยนฺนูนาหํ อิมานิ สํฆิกานิ จีวรานิ สาวตฺถิํ หเรยฺยนฺ”ติ. อถ โข โส ภิกฺขุ ตานิ จีวรานิ อาทาย สาวตฺถิํ คนฺตฺวา ภิกฺขูนํ เอตมตฺถํ อาโรเจสิ. ภิกฺขู ภควโต เอตมตฺถํ อาโรเจสุํ. “อนุชานามิ, ภิกฺขเว, สมฺมุขีภูเตน สํเฆน ภาเชตุํ. อิธ ปน, ภิกฺขเว, ภิกฺขุ อุตุกาลํ เอโก วสติ. ตตฺถ มนุสฺสา— ‘สํฆสฺส เทมา’ติ จีวรานิ เทนฺติ. อนุชานามิ, ภิกฺขเว, เตน ภิกฺขุนา ตานิ จีวรานิ อธิฏฺฐาตุํ— ‘มยฺหิมานิ จีวรานี’ติ. ตสฺส เจ, ภิกฺขเว, ภิกฺขุโน ตํ จีวรํ อนธิฏฺฐิเต อญฺโญ ภิกฺขุ อาคจฺฉติ, สมโก ทาตพฺโพ ภาโค. เตหิ เจ, ภิกฺขเว, ภิกฺขูหิ ตํ จีวรํ ภาชิยมาเน, อปาติเต กุเส, อญฺโญ ภิกฺขุ อาคจฺฉติ, สมโก ทาตพฺโพ ภาโค. เตหิ เจ, ภิกฺขเว, ภิกฺขูหิ ตํ จีวรํ ภาชิยมาเน, ปาติเต กุเส, อญฺโญ ภิกฺขุ อาคจฺฉติ, นากามา ทาตพฺโพ ภาโค”ติ.
เตน โข ปน สมเยน ทฺเว ภาติกา เถรา, อายสฺมา จ อิสิทาโส อายสฺมา จ อิสิภโฏ, สาวตฺถิยํ วสฺสํวุฏฺฐา อญฺญตรํ คามกาวาสํ อคมํสุ. มนุสฺสา— “จิรสฺสาปิ เถรา อาคตา”ติ— สจีวรานิ ภตฺตานิ อทํสุ. อาวาสิกา ภิกฺขู เถเร ปุจฺฉิํสุ— “อิมานิ, ภนฺเต, สํฆิกานิ จีวรานิ เถเร อาคมฺม อุปฺปนฺนานิ, สาทิยิสฺสนฺติ เถรา ภาคนฺ”ติ. เถรา เอวมาหํสุ— “ยถา โข มยํ, อาวุโส, ภควตา ธมฺมํ เทสิตํ อาชานาม, ตุมฺหากํเยว ตานิ จีวรานิ ยาว กถินสฺส อุพฺภารายา”ติ.
เตน โข ปน สมเยน ตโย ภิกฺขู ราชคเห วสฺสํ วสนฺติ. ตตฺถ มนุสฺสา สํฆสฺส เทมาติ จีวรานิ เทนฺติ. อถ โข เตสํ ภิกฺขูนํ เอตทโหสิ— “ภควตา ปญฺญตฺตํ— ‘จตุวคฺโค ปจฺฉิโม สํโฆ’ติ. มยญฺจมฺหา ตโย ชนา. อิเม จ มนุสฺสา สํฆสฺส เทมาติ จีวรานิ เทนฺติ. กถํ นุ โข อเมฺหหิ ปฏิปชฺชิตพฺพนฺ”ติ? เตน โข ปน สมเยน สมฺพหุลา เถรา, อายสฺมา จ นิลวาสี อายสฺมา จ สาณวาสี อายสฺมา จ โคตโก อายสฺมา จ ภคุ อายสฺมา จ ผฬิกสนฺตาโน, ปาฏลิปุตฺเต วิหรนฺติ กุกฺกุฏาราเม. อถ โข เต ภิกฺขู ปาฏลิปุตฺตํ คนฺตฺวา เถเร ปุจฺฉิํสุ. เถรา เอวมาหํสุ— “ยถา โข มยํ อาวุโส ภควตา ธมฺมํ เทสิตํ อาชานาม, ตุมฺหากํเยว ตานิ จีวรานิ ยาว กถินสฺส อุพฺภารายา”ติ.