8.22 อุปนนฺทสกฺยปุตฺตวตฺถุ
เตน โข ปน สมเยน อายสฺมา อุปนนฺโท สกฺยปุตฺโต สาวตฺถิยํ วสฺสํวุฏฺโฐ อญฺญตรํ คามกาวาสํ อคมาสิ. ตตฺถ จ ภิกฺขู จีวรํ ภาเชตุกามา สนฺนิปติํสุ. เต เอวมาหํสุ— “อิมานิ โข, อาวุโส, สํฆิกานิ จีวรานิ ภาชิยิสฺสนฺติ, สาทิยิสฺสสิ ภาคนฺ”ติ? “อามาวุโส, สาทิยิสฺสามี”ติ. ตโต จีวรภาคํ คเหตฺวา อญฺญํ อาวาสํ อคมาสิ. ตตฺถปิ ภิกฺขู จีวรํ ภาเชตุกามา สนฺนิปติํสุ. เตปิ เอวมาหํสุ— “อิมานิ โข, อาวุโส, สํฆิกานิ จีวรานิ ภาชิยิสฺสนฺติ, สาทิยิสฺสสิ ภาคนฺ”ติ? “อามาวุโส, สาทิยิสฺสามี”ติ. ตโตปิ จีวรภาคํ คเหตฺวา อญฺญํ อาวาสํ อคมาสิ. ตตฺถปิ ภิกฺขู จีวรํ ภาเชตุกามา สนฺนิปติํสุ. เตปิ เอวมาหํสุ— “อิมานิ โข, อาวุโส, สํฆิกานิ จีวรานิ ภาชิยิสฺสนฺติ, สาทิยิสฺสสิ ภาคนฺ”ติ? “อามาวุโส, สาทิยิสฺสามี”ติ. ตโตปิ จีวรภาคํ คเหตฺวา มหนฺตํ จีวรภณฺฑิกํ อาทาย ปุนเทว สาวตฺถิํ ปจฺจาคญฺฉิ.
ภิกฺขู เอวมาหํสุ— “มหาปุญฺโญสิ ตฺวํ, อาวุโส อุปนนฺท, พหุํ เต จีวรํ อุปฺปนฺนนฺ”ติ. “กุโต เม, อาวุโส, ปุญฺญํ? อิธาหํ, อาวุโส, สาวตฺถิยํ วสฺสํวุฏฺโฐ อญฺญตรํ คามกาวาสํ อคมาสิํ. ตตฺถ ภิกฺขู จีวรํ ภาเชตุกามา สนฺนิปติํสุ. เต มํ เอวมาหํสุ— ‘อิมานิ โข, อาวุโส, สํฆิกานิ จีวรานิ ภาชิยิสฺสนฺติ, สาทิยิสฺสสิ ภาคนฺ’ติ? ‘อามาวุโส, สาทิยิสฺสามี’ติ. ตโต จีวรภาคํ คเหตฺวา อญฺญํ อาวาสํ อคมาสิํ. ตตฺถปิ ภิกฺขู จีวรํ ภาเชตุกามา สนฺนิปติํสุ. เตปิ มํ เอวมาหํสุ— ‘อิมานิ โข, อาวุโส, สํฆิกานิ จีวรานิ ภาชิยิสฺสนฺติ, สาทิยิสฺสสิ ภาคนฺ’ติ? ‘อามาวุโส, สาทิยิสฺสามี’ติ. ตโตปิ จีวรภาคํ คเหตฺวา อญฺญํ อาวาสํ อคมาสิํ. ตตฺถปิ ภิกฺขู จีวรํ ภาเชตุกามา สนฺนิปติํสุ. เตปิ มํ เอวมาหํสุ— ‘อิมานิ โข, อาวุโส, สํฆิกานิ จีวรานิ ภาชิยิสฺสนฺติ, สาทิยิสฺสสิ ภาคนฺ’ติ? ‘อามาวุโส, สาทิยิสฺสามี’ติ. ตโตปิ จีวรภาคํ อคฺคเหสิํ. เอวํ เม พหุํ จีวรํ อุปฺปนฺนนฺ”ติ. “กิํ ปน ตฺวํ, อาวุโส อุปนนฺท, อญฺญตฺร วสฺสํวุฏฺโฐ อญฺญตฺร จีวรภาคํ สาทิยี”ติ? “เอวมาวุโส”ติ.
เย เต ภิกฺขู อปฺปิจฺฉา …เป… เต อุชฺฌายนฺติ ขิยฺยนฺติ วิปาเจนฺติ— “กถญฺหิ นาม อายสฺมา อุปนนฺโท สกฺยปุตฺโต อญฺญตฺร วสฺสํวุฏฺโฐ อญฺญตฺร จีวรภาคํ สาทิยิสฺสตี”ติ. ภควโต เอตมตฺถํ อาโรเจสุํ …เป… “สจฺจํ กิร ตฺวํ, อุปนนฺท, อญฺญตฺร วสฺสํวุฏฺโฐ อญฺญตฺร จีวรภาคํ สาทิยี”ติ? “สจฺจํ, ภควา”ติ. วิครหิ พุทฺโธ ภควา …เป… กถญฺหิ นาม ตฺวํ, โมฆปุริส, อญฺญตฺร วสฺสํวุฏฺโฐ อญฺญตฺร จีวรภาคํ สาทิยิสฺสสิ. เนตํ, โมฆปุริส, อปฺปสนฺนานํ วา ปสาทาย …เป… วิครหิตฺวา …เป… ธมฺมิํ กถํ กตฺวา ภิกฺขู อามนฺเตสิ— “น, ภิกฺขเว, อญฺญตฺร วสฺสํวุฏฺเฐน อญฺญตฺร จีวรภาโค สาทิตพฺโพ. โย สาทิเยยฺย, อาปตฺติ ทุกฺกฏสฺสา”ติ.
เตน โข ปน สมเยน อายสฺมา อุปนนฺโท สกฺยปุตฺโต เอโก ทฺวีสุ อาวาเสสุ วสฺสํ วสิ— “เอวํ เม พหุํ จีวรํ อุปฺปชฺชิสฺสตี”ติ. อถ โข เตสํ ภิกฺขูนํ เอตทโหสิ— “กถํ นุ โข อายสฺมโต อุปนนฺทสฺส สกฺยปุตฺตสฺส จีวรปฏิวีโส ทาตพฺโพ”ติ? ภควโต เอตมตฺถํ อาโรเจสุํ. “เทถ, ภิกฺขเว, โมฆปุริสสฺส เอกาธิปฺปายํ. อิธ ปน, ภิกฺขเว, ภิกฺขุ เอโก ทฺวีสุ อาวาเสสุ วสฺสํ วสติ— ‘เอวํ เม พหุํ จีวรํ อุปฺปชฺชิสฺสตี’ติ. สเจ อมุตฺร อุปฑฺฒํ อมุตฺร อุปฑฺฒํ วสติ, อมุตฺร อุปฑฺโฒ อมุตฺร อุปฑฺโฒ จีวรปฏิวีโส ทาตพฺโพ. ยตฺถ วา ปน พหุตรํ วสติ, ตโต จีวรปฏิวีโส ทาตพฺโพ”ติ.