8.31 อฏฺฐจีวรมาติกา
อฏฺฐิมา, ภิกฺขเว, มาติกา จีวรสฺส อุปฺปาทาย— สีมาย เทติ, กติกาย เทติ, ภิกฺขาปญฺญตฺติยา เทติ, สํฆสฺส เทติ, อุภโตสํฆสฺส เทติ, วสฺสํวุฏฺฐสํฆสฺส เทติ, อาทิสฺส เทติ, ปุคฺคลสฺส เทติ.
สีมาย เทติ— ยาวติกา ภิกฺขู อนฺโตสีมคตา เตหิ ภาเชตพฺพํ. กติกาย เทติ— สมฺพหุลา อาวาสา สมานลาภา โหนฺติ เอกสฺมิํ อาวาเส ทินฺเน สพฺพตฺถ ทินฺนํ โหติ. ภิกฺขาปญฺญตฺติยา เทติ, ยตฺถ สํฆสฺส ธุวการา กริยฺยนฺติ, ตตฺถ เทติ. สํฆสฺส เทติ, สมฺมุขีภูเตน สํเฆน ภาเชตพฺพํ. อุภโตสํฆสฺส เทติ, พหุกาปิ ภิกฺขู โหนฺติ, เอกา ภิกฺขุนี โหติ, อุปฑฺฒํ ทาตพฺพํ, พหุกาปิ ภิกฺขุนิโย โหนฺติ, เอโก ภิกฺขุ โหติ, อุปฑฺฒํ ทาตพฺพํ. วสฺสํวุฏฺฐสํฆสฺส เทติ, ยาวติกา ภิกฺขู ตสฺมิํ อาวาเส วสฺสํวุฏฺฐา, เตหิ ภาเชตพฺพํ. อาทิสฺส เทติ, ยาคุยา วา ภตฺเต วา ขาทนีเย วา จีวเร วา เสนาสเน วา เภสชฺเช วา. ปุคฺคลสฺส เทติ— ‘อิมํ จีวรํ อิตฺถนฺนามสฺส ทมฺมี’”ติ.
จีวรกฺขนฺธโก อฏฺฐโม.
ตสฺสุทฺทานํ
ราชคหโก เนคโม,
ทิสฺวา เวสาลิยํ คณิํ;
ปุน ราชคหํ คนฺตฺวา,
รญฺโญ ตํ ปฏิเวทยิ.
ปุตฺโต สาลวติกาย,
อภยสฺส หิ อตฺรโช;
ชีวตีติ กุมาเรน,
สงฺขาโต ชีวโก อิติ.
โส หิ ตกฺกสีลํ คนฺตฺวา,
อุคฺคเหตฺวา มหาภิโส;_
สตฺตวสฺสิกอาพาธํ,
นตฺถุกมฺเมน นาสยิ.
รญฺโญ ภคนฺทลาพาธํ,
อาเลเปน อปากฑฺฒิ;
มมญฺจ อิตฺถาคารญฺจ,
พุทฺธสํฆํ จุปฏฺฐหิ.
ราชคหโก จ เสฏฺฐิ,
อนฺตคณฺฐิ ติกิจฺฉิตํ;
ปชฺโชตสฺส มหาโรคํ,
ฆตปาเนน นาสยิ.
อธิการญฺจ สิเวยฺยํ,
อภิสนฺนํ สิเนหติ;
ตีหิ อุปฺปลหตฺเถหิ,
สมตฺติํสวิเรจนํ.
ปกตตฺตํ วรํ ยาจิ,
สิเวยฺยญฺจ ปฏิคฺคหิ;
จีวรญฺจ คิหิทานํ,
อนุญฺญาสิ ตถาคโต.
ราชคเห ชนปเท,
พหุํ อุปฺปชฺชิ จีวรํ;
ปาวาโร โกสิยญฺเจว,
โกชโว อฑฺฒกาสิกํ.
อุจฺจาวจา จ สนฺตุฏฺฐิ,_
นาคเมสาคเมสุํ จ;
ปฐมํ ปจฺฉา สทิสา,
กติกา จ ปฏิหรุํ.
ภณฺฑาคารํ อคุตฺตญฺจ,
วุฏฺฐาเปนฺติ ตเถว จ;
อุสฺสนฺนํ โกลาหลญฺจ,_
กถํ ภาเช กถํ ทเท.
สกาติเรกภาเคน,
ปฏิวีโส กถํ ทเท;
ฉกเณน สีตุทกา,
อุตฺตริตุ น ชานเร._
โอโรเปนฺตา ภาชนญฺจ,
ปาติยา จ ฉมาย จ;
อุปจิกา มชฺเฌ ชีรนฺติ,_
เอกโต ปตฺถินฺเนน จ.
ผรุสาจฺฉินฺนจฺฉิพนฺธา,
อทฺทสาสิ อุพฺภณฺฑิเต;
วีมํสิตฺวา สกฺยมุนิ,
อนุญฺญาสิ ติจีวรํ.
อญฺเญน อติเรเกน,
อุปฺปชฺชิ ฉิทฺทเมว จ;_
จาตุทฺทีโป วรํ ยาจิ,
ทาตุํ วสฺสิกสาฏิกํ.
อาคนฺตุคมิคิลานํ,
อุปฏฺฐากญฺจ เภสชฺชํ;_
ธุวํ อุทกสาฏิญฺจ,
ปณีตํ อติขุทฺทกํ.
ถุลฺลกจฺฉุมุขํ โขมํ,
ปริปุณฺณํ อธิฏฺฐานํ;
ปจฺฉิมํ กโต ครุโก,
วิกณฺโณ สุตฺตโมกิริ.
ลุชฺชนฺติ นปฺปโหนฺติ,
จ อนฺวาธิกํ พหูนิ จ;
อนฺธวเน อสฺสติยา,
เอโก วสฺสํ อุตุมฺหิ จ.
ทฺเว ภาตุกา ราชคเห,
อุปนนฺโท ปุน ทฺวิสุ;_
กุจฺฉิวิกาโร คิลาโน,
อุโภ เจว คิลานกา._
นคฺคา กุสา วากจีรํ,
ผลโก เกสกมฺพลํ;
วาเฬาลูกปกฺขญฺจ,
อชินํ อกฺกนาฬกํ.
โปตฺถกํ นีลปีตญฺจ,
โลหิตํ มญฺชิฏฺเฐน จ;
กณฺหา มหารงฺคนาม,
อจฺฉินฺนทสิกา ตถา.
ทีฆปุปฺผผณทสา,
กญฺจุติรีฏเวฐนํ;
อนุปฺปนฺเน ปกฺกมติ,
สํโฆ ภิชฺชติ ตาวเท.
ปกฺเข ททนฺติ สํฆสฺส,
อายสฺมา เรวโต ปหิ;
วิสฺสาสคาหาธิฏฺฐาติ,
อฏฺฐ จีวรมาติกาติ.
อิมมฺหิ ขนฺธเก วตฺถู ฉนฺนวุติ.
จีวรกฺขนฺธโก นิฏฺฐิโต.