9.6 ทฺเวนิสฺสารณาทิกถา
ทฺเวมา, ภิกฺขเว, นิสฺสารณา. อตฺถิ, ภิกฺขเว, ปุคฺคโล อปฺปตฺโต นิสฺสารณํ. ตญฺเจ สํโฆ นิสฺสาเรติ, เอกจฺโจ สุนิสฺสาริโต, เอกจฺโจ ทุนฺนิสฺสาริโต. กตโม จ, ภิกฺขเว, ปุคฺคโล อปฺปตฺโต นิสฺสารณํ, ตญฺเจ สํโฆ นิสฺสาเรติ— ทุนฺนิสฺสาริโต? อิธ ปน, ภิกฺขเว, ภิกฺขุ สุทฺโธ โหติ อนาปตฺติโก. ตญฺเจ สํโฆ นิสฺสาเรติ— ทุนฺนิสฺสาริโต. อยํ วุจฺจติ, ภิกฺขเว, ปุคฺคโล อปฺปตฺโต นิสฺสารณํ, ตญฺเจ สํโฆ นิสฺสาเรติ— ทุนฺนิสฺสาริโต.
กตโม จ, ภิกฺขเว, ปุคฺคโล อปฺปตฺโต นิสฺสารณํ, ตญฺเจ สํโฆ นิสฺสาเรติ— สุนิสฺสาริโต? อิธ ปน, ภิกฺขเว, ภิกฺขุ พาโล โหติ อพฺยตฺโต อาปตฺติพหุโล อนปทาโน, คิหิสํสฏฺโฐ วิหรติ อนนุโลมิเกหิ คิหิสํสคฺเคหิ, ตญฺเจ สํโฆ นิสฺสาเรติ— สุนิสฺสาริโต. อยํ วุจฺจติ, ภิกฺขเว, ปุคฺคโล อปฺปตฺโต นิสฺสารณํ, ตญฺเจ สํโฆ นิสฺสาเรติ— สุนิสฺสาริโต.
ทฺเวมา, ภิกฺขเว, โอสารณา. อตฺถิ, ภิกฺขเว, ปุคฺคโล อปฺปตฺโต โอสารณํ ตญฺเจ สํโฆ โอสาเรติ, เอกจฺโจ โสสาริโต, เอกจฺโจ โทสาริโต. กตโม จ, ภิกฺขเว, ปุคฺคโล อปฺปตฺโต โอสารณํ, ตญฺเจ สํโฆ โอสาเรติ— โทสาริโต? ปณฺฑโก, ภิกฺขเว, อปฺปตฺโต โอสารณํ, ตญฺเจ สํโฆ โอสาเรติ— โทสาริโต. เถยฺยสํวาสโก, ภิกฺขเว, อปฺปตฺโต โอสารณํ, ตญฺเจ สํโฆ โอสาเรติ— โทสาริโต. ติตฺถิยปกฺกนฺตโก, ภิกฺขเว …เป… ติรจฺฉานคโต, ภิกฺขเว… มาตุฆาตโก, ภิกฺขเว… ปิตุฆาตโก, ภิกฺขเว… อรหนฺตฆาตโก, ภิกฺขเว… ภิกฺขุนิทูสโก, ภิกฺขเว… สํฆเภทโก, ภิกฺขเว… โลหิตุปฺปาทโก, ภิกฺขเว… อุภโตพฺยญฺชนโก, ภิกฺขเว, อปฺปตฺโต, โอสารณํ, ตญฺเจ สํโฆ โอสาเรติ— โทสาริโต. อยํ วุจฺจติ, ภิกฺขเว, ปุคฺคโล อปฺปตฺโต โอสารณํ, ตญฺเจ สํโฆ โอสาเรติ— โทสาริโต. อิเม วุจฺจนฺติ, ภิกฺขเว, ปุคฺคลา อปฺปตฺตา โอสารณํ, เต เจ สํโฆ โอสาเรติ— โทสาริตา.
กตโม จ, ภิกฺขเว, ปุคฺคโล อปฺปตฺโต โอสารณํ, ตญฺเจ สํโฆ โอสาเรติ— โสสาริโต? หตฺถจฺฉินฺโน, ภิกฺขเว, อปฺปตฺโต โอสารณํ, ตญฺเจ สํโฆ โอสาเรติ, โสสาริโต. ปาทจฺฉินฺโน, ภิกฺขเว …เป… หตฺถปาทจฺฉินฺโน, ภิกฺขเว… กณฺณจฺฉินฺโน, ภิกฺขเว… นาสจฺฉินฺโน, ภิกฺขเว… กณฺณนาสจฺฉินฺโน, ภิกฺขเว… องฺคุลิจฺฉินฺโน, ภิกฺขเว… อฬจฺฉินฺโน, ภิกฺขเว… กณฺฑรจฺฉินฺโน, ภิกฺขเว… ผณหตฺถโก, ภิกฺขเว… ขุชฺโช, ภิกฺขเว… วามโน, ภิกฺขเว… คลคณฺฑี, ภิกฺขเว… ลกฺขณาหโต, ภิกฺขเว… กสาหโต, ภิกฺขเว… ลิขิตโก, ภิกฺขเว… สีปทิโก, ภิกฺขเว… ปาปโรคี, ภิกฺขเว… ปริสทูสโก, ภิกฺขเว… กาโณ, ภิกฺขเว… กุณี, ภิกฺขเว… ขญฺโช, ภิกฺขเว… ปกฺขหโต, ภิกฺขเว… ฉินฺนิริยาปโถ, ภิกฺขเว… ชราทุพฺพโล, ภิกฺขเว… อนฺโธ, ภิกฺขเว… มูโค, ภิกฺขเว… พธิโร, ภิกฺขเว… อนฺธมูโค, ภิกฺขเว… อนฺธพธิโร, ภิกฺขเว… มูคพธิโร, ภิกฺขเว… อนฺธมูคพธิโร, ภิกฺขเว, อปฺปตฺโต โอสารณํ, ตญฺเจ สํโฆ โอสาเรติ— โสสาริโต. อยํ วุจฺจติ, ภิกฺขเว, ปุคฺคโล อปฺปตฺโต โอสารณํ, ตญฺเจ สํโฆ โอสาเรติ— โสสาริโต. อิเม วุจฺจนฺติ, ภิกฺขเว, ปุคฺคลา อปฺปตฺตา โอสารณํ, เต เจ สํโฆ โอสาเรติ— โสสาริตา.
วาสภคามภาณวาโร นิฏฺฐิโต ปฐโม.