9.7 อธมฺมกมฺมาทิกถา
อิธ ปน, ภิกฺขเว, ภิกฺขุสฺส น โหติ อาปตฺติ ทฏฺฐพฺพา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปสฺสเสตํ อาปตฺตินฺ’ติ? โส เอวํ วเทติ— ‘นตฺถิ เม, อาวุโส, อาปตฺติ, ยมหํ ปเสฺสยฺยนฺ’ติ. ตํ สํโฆ อาปตฺติยา อทสฺสเน อุกฺขิปติ— อธมฺมกมฺมํ.
อิธ ปน, ภิกฺขเว, ภิกฺขุสฺส น โหติ อาปตฺติ ปฏิกาตพฺพา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปฏิกโรหิ ตํ อาปตฺตินฺ’ติ. โส เอวํ วเทติ— ‘นตฺถิ เม, อาวุโส, อาปตฺติ, ยมหํ ปฏิกเรยฺยนฺ’ติ. ตํ สํโฆ อาปตฺติยา อปฺปฏิกมฺเม อุกฺขิปติ— อธมฺมกมฺมํ.
อิธ ปน, ภิกฺขเว, ภิกฺขุสฺส น โหติ ปาปิกา ทิฏฺฐิ ปฏินิสฺสชฺเชตา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘ปาปิกา เต, อาวุโส, ทิฏฺฐิ, ปฏินิสฺสชฺเชตํ ปาปิกํ ทิฏฺฐินฺ’ติ. โส เอวํ วเทติ— ‘นตฺถิ เม, อาวุโส, ปาปิกา ทิฏฺฐิ, ยมหํ ปฏินิสฺสชฺเชยฺยนฺ’ติ. ตํ สํโฆ ปาปิกาย ทิฏฺฐิยา อปฺปฏินิสฺสคฺเค อุกฺขิปติ— อธมฺมกมฺมํ.
อิธ ปน, ภิกฺขเว, ภิกฺขุสฺส น โหติ อาปตฺติ ทฏฺฐพฺพา, น โหติ อาปตฺติ ปฏิกาตพฺพา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปสฺสเสตํ อาปตฺติํ? ปฏิกโรหิ ตํ อาปตฺตินฺ’ติ. โส เอวํ วเทติ— ‘นตฺถิ เม, อาวุโส, อาปตฺติ, ยมหํ ปเสฺสยฺยํ. นตฺถิ เม, อาวุโส, อาปตฺติ, ยมหํ ปฏิกเรยฺยนฺ’ติ. ตํ สํโฆ อทสฺสเน วา อปฺปฏิกมฺเม วา อุกฺขิปติ— อธมฺมกมฺมํ.
อิธ ปน, ภิกฺขเว, ภิกฺขุสฺส น โหติ อาปตฺติ ทฏฺฐพฺพา, น โหติ ปาปิกา ทิฏฺฐิ ปฏินิสฺสชฺเชตา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปสฺสเสตํ อาปตฺติํ? ปาปิกา เต ทิฏฺฐิ, ปฏินิสฺสชฺเชตํ ปาปิกํ ทิฏฺฐินฺ’ติ. โส เอวํ วเทติ— ‘นตฺถิ เม, อาวุโส, อาปตฺติ, ยมหํ ปเสฺสยฺยํ; นตฺถิ เม, อาวุโส, ปาปิกา ทิฏฺฐิ, ยมหํ ปฏินิสฺสชฺเชยฺยนฺ’ติ. ตํ สํโฆ อทสฺสเน วา อปฺปฏินิสฺสคฺเค วา อุกฺขิปติ— อธมฺมกมฺมํ.
อิธ ปน, ภิกฺขเว, ภิกฺขุสฺส น โหติ อาปตฺติ ปฏิกาตพฺพา, น โหติ ปาปิกา ทิฏฺฐิ ปฏินิสฺสชฺเชตา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปฏิกโรหิ ตํ อาปตฺติํ; ปาปิกา เต ทิฏฺฐิ, ปฏินิสฺสชฺเชตํ ปาปิกํ ทิฏฺฐินฺ’ติ. โส เอวํ วเทติ— ‘นตฺถิ เม, อาวุโส, อาปตฺติ, ยมหํ ปฏิกเรยฺยํ. นตฺถิ เม, อาวุโส, ปาปิกา ทิฏฺฐิ, ยมหํ ปฏินิสฺสชฺเชยฺยนฺ’ติ. ตํ สํโฆ อปฺปฏิกมฺเม วา อปฺปฏินิสฺสคฺเค วา อุกฺขิปติ— อธมฺมกมฺมํ.
อิธ ปน, ภิกฺขเว, ภิกฺขุสฺส น โหติ อาปตฺติ ทฏฺฐพฺพา, น โหติ อาปตฺติ ปฏิกาตพฺพา, น โหติ ปาปิกา ทิฏฺฐิ ปฏินิสฺสชฺเชตา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปสฺสเสตํ อาปตฺติํ? ปฏิกโรหิ ตํ อาปตฺติํ; ปาปิกา เต ทิฏฺฐิ, ปฏินิสฺสชฺเชตํ ปาปิกํ ทิฏฺฐินฺ’ติ. โส เอวํ วเทติ— ‘นตฺถิ เม, อาวุโส, อาปตฺติ, ยมหํ ปเสฺสยฺยํ. นตฺถิ เม, อาวุโส, อาปตฺติ, ยมหํ ปฏิกเรยฺยํ. นตฺถิ เม, อาวุโส, ปาปิกา ทิฏฺฐิ, ยมหํ ปฏินิสฺสชฺเชยฺยนฺ’ติ. ตํ สํโฆ อทสฺสเน วา อปฺปฏิกมฺเม วา อปฺปฏินิสฺสคฺเค วา อุกฺขิปติ— อธมฺมกมฺมํ.
อิธ ปน, ภิกฺขเว, ภิกฺขุสฺส โหติ อาปตฺติ ทฏฺฐพฺพา. ตเมนํ โจเทติ. สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปสฺสเสตํ อาปตฺตินฺ’ติ? โส เอวํ วเทติ— ‘อามาวุโส, ปสฺสามี’ติ. ตํ สํโฆ อาปตฺติยา อทสฺสเน อุกฺขิปติ— อธมฺมกมฺมํ.
อิธ ปน, ภิกฺขเว, ภิกฺขุสฺส โหติ อาปตฺติ ปฏิกาตพฺพา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปฏิกโรหิ ตํ อาปตฺตินฺ’ติ. โส เอวํ วเทติ— ‘อามาวุโส, ปฏิกริสฺสามี’ติ. ตํ สํโฆ อาปตฺติยา อปฺปฏิกมฺเม อุกฺขิปติ— อธมฺมกมฺมํ.
อิธ ปน, ภิกฺขเว, ภิกฺขุสฺส โหติ ปาปิกา ทิฏฺฐิ ปฏินิสฺสชฺเชตา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘ปาปิกา เต, อาวุโส, ทิฏฺฐิ; ปฏินิสฺสชฺเชตํ ปาปิกํ ทิฏฺฐินฺ’ติ. โส เอวํ วเทติ— ‘อามาวุโส, ปฏินิสฺสชฺชิสฺสามี’ติ. ตํ สํโฆ ปาปิกาย ทิฏฺฐิยา อปฺปฏินิสฺสคฺเค อุกฺขิปติ— อธมฺมกมฺมํ.
อิธ ปน, ภิกฺขเว, ภิกฺขุสฺส โหติ อาปตฺติ ทฏฺฐพฺพา, โหติ อาปตฺติ ปฏิกาตพฺพา …เป… โหติ อาปตฺติ ทฏฺฐพฺพา, โหติ ปาปิกา ทิฏฺฐิ ปฏินิสฺสชฺเชตา …เป… โหติ อาปตฺติ ปฏิกาตพฺพา, โหติ ปาปิกา ทิฏฺฐิ ปฏินิสฺสชฺเชตา …เป… โหติ อาปตฺติ ทฏฺฐพฺพา, โหติ อาปตฺติ ปฏิกาตพฺพา, โหติ ปาปิกา ทิฏฺฐิ ปฏินิสฺสชฺเชตา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปสฺสเสตํ อาปตฺติํ? ปฏิกโรหิ ตํ อาปตฺติํ; ปาปิกา เต ทิฏฺฐิ, ปฏินิสฺสชฺเชตํ ปาปิกํ ทิฏฺฐินฺ’ติ. โส เอวํ วเทติ— ‘อามาวุโส, ปสฺสามิ, อาม ปฏิกริสฺสามิ, อาม ปฏินิสฺสชฺชิสฺสามี’ติ. ตํ สํโฆ อทสฺสเน วา อปฺปฏิกมฺเม วา อปฺปฏินิสฺสคฺเค วา อุกฺขิปติ— อธมฺมกมฺมํ.
อิธ ปน, ภิกฺขเว, ภิกฺขุสฺส โหติ อาปตฺติ ทฏฺฐพฺพา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปสฺสเสตํ อาปตฺตินฺ’ติ? โส เอวํ วเทติ— ‘นตฺถิ เม, อาวุโส, อาปตฺติ, ยมหํ ปเสฺสยฺยนฺ’ติ. ตํ สํโฆ อาปตฺติยา อทสฺสเน อุกฺขิปติ— ธมฺมกมฺมํ.
อิธ ปน, ภิกฺขเว, ภิกฺขุสฺส โหติ อาปตฺติ ปฏิกาตพฺพา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปฏิกโรหิ ตํ อาปตฺตินฺ’ติ. โส เอวํ วเทติ— ‘นตฺถิ เม, อาวุโส, อาปตฺติ, ยมหํ ปฏิกเรยฺยนฺ’ติ. ตํ สํโฆ อาปตฺติยา อปฺปฏิกมฺเม อุกฺขิปติ— ธมฺมกมฺมํ.
อิธ ปน, ภิกฺขเว, ภิกฺขุสฺส โหติ ปาปิกา ทิฏฺฐิ ปฏินิสฺสชฺเชตา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘ปาปิกา เต, อาวุโส, ทิฏฺฐิ, ปฏินิสฺสชฺเชตํ ปาปิกํ ทิฏฺฐินฺ’ติ. โส เอวํ วเทติ— ‘นตฺถิ เม, อาวุโส, ปาปิกา ทิฏฺฐิ, ยมหํ ปฏินิสฺสชฺเชยฺยนฺ’ติ. ตํ สํโฆ ปาปิกาย ทิฏฺฐิยา อปฺปฏินิสฺสคฺเค อุกฺขิปติ— ธมฺมกมฺมํ.
อิธ ปน, ภิกฺขเว, ภิกฺขุสฺส โหติ อาปตฺติ ทฏฺฐพฺพา, โหติ อาปตฺติ ปฏิกาตพฺพา …เป… โหติ อาปตฺติ ทฏฺฐพฺพา, โหติ ปาปิกา ทิฏฺฐิ ปฏินิสฺสชฺเชตา …เป… โหติ อาปตฺติ ปฏิกาตพฺพา, โหติ ปาปิกา ทิฏฺฐิ ปฏินิสฺสชฺเชตา …เป… โหติ อาปตฺติ ทฏฺฐพฺพา, โหติ อาปตฺติ ปฏิกาตพฺพา, โหติ ปาปิกา ทิฏฺฐิ ปฏินิสฺสชฺเชตา. ตเมนํ โจเทติ สํโฆ วา สมฺพหุลา วา เอกปุคฺคโล วา— ‘อาปตฺติํ ตฺวํ, อาวุโส, อาปนฺโน, ปสฺสเสตํ อาปตฺติํ? ปฏิกโรหิ ตํ อาปตฺติํ. ปาปิกา เต ทิฏฺฐิ, ปฏินิสฺสชฺเชตํ ปาปิกํ ทิฏฺฐินฺ’ติ. โส เอวํ วเทติ— ‘นตฺถิ เม, อาวุโส, อาปตฺติ, ยมหํ ปเสฺสยฺยํ. นตฺถิ เม, อาวุโส, อาปตฺติ ยมหํ ปฏิกเรยฺยํ. นตฺถิ เม, อาวุโส, ปาปิกา ทิฏฺฐิ, ยมหํ ปฏินิสฺสชฺเชยฺยนฺ’ติ. ตํ สํโฆ อทสฺสเน วา อปฺปฏิกมฺเม วา อปฺปฏินิสฺสคฺเค วา อุกฺขิปติ— ธมฺมกมฺมนฺ”ติ.